Padi Dek Mancik Bawang Dek Kabuk

WANDY

Padi Dek Mancik Bawang Dek Kabuk

            “Yolah sabana parah ekonomi masyarakat awak kini, Mak! Daya bali masyarakat sabana lamah, rupiah alah samakin tapuruek pulo dek Dolar Amerika. Antah kabaa hiduik awak kamungko lai,” kecek Yuang Dede, ka Mak Jisan, katiko maota-ota sadang duduak manunggu salat Ashar di kadai kopi milik Mak Atin, Kawasan Jarbat, Rabu kapatang.

            “Apo maksud waang kini go, Yuang! Carito ekonomi parah, tapi kok lah sampai pulo ka carito Dolar bagai?,” tanyo Mak Jisan, baliak batanyo ka Buyuang Dede, sambia maaduak kopi nan baru inyo pasan. “Maksudnyo mode iko Mak! Tadi awak ka pasa Solok, indak biaso-biasonyo pasa raya Solok tu langang do! Tapi setelah awak carito kian kamari jo para pedagang, apo penyebab pasa langang, ternyato ado pangaruah anjloknyo harago pitih awak dek dolar tu, iyo sangek gadang. Sudah tu, para patani awak gagal panen pulo, kalau padi iyo dek manciak, samantaro petani bawang jo tanaman mudo lainnyo rusak pulo dek kabuk asap. Baa lo indak kaparah dek amak du!,” jawek Buyuang Dede, sambia manyaloan rokok kretek kesukaannyo. Oo, kalau mode tu, amak kini alah mangarati maksud wang mah! Sabanayo tando-tando ekonomi masyarakat lamah, indak di pasa Solok sajo kini nan langang do. Di pasa Raya Padang kalau hari alah malam, pasti akan langang pulo,” jawek Mak Jisan, sambia bagarah ka Buyuang Dede. Maklum duo urang tu, antaro serius jo bagarah susah mambedekannyo. “Kalau malam indak pasa raya Padang sen nan langan do, Mak! Pasa Minggu Guguak tu langan pulo mah, mak!,” kecek Buyuang Dede indak mau kalah.

            “Kalau padi dek mancik, seharusnyo Dinas Pertanian awak turun ka sawah jo kaladang mambantu para petani mencarikan solusi, baa urang nan gagal panen tu bisa di bantu. Baitu juo tanaman bawang jo tanaman mudo lain nan kanai dek kabuk, harus ado solusi dari dinas, apokoh dibantu pengadaan bibit atau bantuan lainnyo. Bukankah kalau petani ada prestasi, nan dapek penghargaan adalah Bupati atau Kadisnyo nan dipanggia ka istana. Tapi kalau sarupo kini, kama urang-urang tu?,” sela Kak Teri, nan dari tadi serius manonton tivi nan mancaritoan masalah kawin sajenis di pulau Bali. “Bana apo nan Kak Teri sampaian tu mah. Anggaran di Dinas Pertanian tu gadang, tapi kabanyo urang nan karajo di Dinas tua alah banyak nan main proyek. Jabatannyo digunakan untuak mencari keuntungan pribadi sajo. Dapek proyek nyo agian ka dunsanak atau rekanan nan bisa diajak kongkolingkong. Sudah tu nyo manarimo fee sajolai,” jawek Yuang Dede, nan mangarati bana masalah proyek, sabek inyo lamo sato proyek banda multiyer yakni pembangunan Batang Aia Sungai Batuang.

            “Kalau yang main proyek tu indak di Dinas Pertanian sajo do, Yuang! Di SKPD mano se, tamasuak di Dinas Pekerjaan Umum, Pendidikan, Kesehatan dan lain sebagainyo, itu alah menjadi rahasio umum nah. Apolai sempat jadi Kabid atau Kadis, mako sangat gadang peluang untuak maatur dan main proyek mah!,” baleh Mak Jisan, sambia manyambuang rokoknyo nan alah tapuntuang. “Manga pulo urang dinas tu kadipagunjingan tu. Mambuek doso awak se mah. Indak kadis atau kabag nan salah do! Tapi manga awak indak namuah sakola dulu surang-surang. Ko indak, alah manjadi kadis pulo mah,” sela Upiak Nane, bini Atin nan sadang manarika baju, tapi tetap mengupiang carito Mak Jisan jo Buyuang Dede. “Kok jadi pagawai jan bacarito pulo kau lai, Piek! Mau hujan atau paneh, mau dek manciek padi atau rusak bawang dek musim kabuk, nan PNS tu tetap aka manarimo gaji panuah di akhir bulan, kecuali nan manggadekan SK,” tarang Mak Jisan, sambia minta pamit ka urang saisi lapau, maklum alah tadanga azan salat Ashar dari surau Jarbat***