WANDY
Roda Muatasi Baputa Juo
“KABANYO
roda mutasi alah baputa Sanayan kapatang di Pemerintahan Kabupaten awakko, Ndy!
Apo infonyo yo lai bana, tu?,” tanyo Mak Malin Sampono ka Andy Bule, sarupo
biaso, katiko mamulai ota sanjo di lapau politik milik Da Indra, nan lokasinyo
indak jauah dari Tugu Ayam Arosuka, Rabu sore kapatang.
“Kok
awak baco di KORAN PADANG, kabanyo mutasi baru untuak pejabat eselon tigo, Mak!
Untuak pejabat eselon duo, mungkin sakitar bulan Januari tahun dimungko,” jawek
Andy Bule, sambia tangannyo sibuk manakan HP mambaleh WA dari kawannyo nan kini
alah diangkek manjadi Sekretaris di sebuah SKPD, walau kapatangko masih batugeh
di bagiang fungsional Sekretariat Daerah. Andy mananyoan bilo kawannyo tu kasertijab
dan kalau bisa minta proyek sataun agak tigo. “Tapi nan jaleh, mutasi kapatang
tu, saindak-indaknyo alah bisa manjawek pertanyaan babarapo urang nan salomoko
alah manjadi teka teki se dek pagawai jo masyarakat. Lambek jo lamo, mutasi
untuak eselon duo pasti akan baputa juo. Kalau indak, kasian pulo awak dek para
tim sukses nan sajak awal alah setia mandukuang Bupati tapiliah. Nan jaleh
urang-urang tu mandukuang pasti maharok suatu jabatan,” kecek Mak Malin
Sampono, agak blak-blakan, maklum maota lapeh di lapau nan indak ado akan
barasiko ka Mak Malin Sampono, sabek baliau tu bukan PNS dan juo bukan urang
salah satu anggota Parpol. “Tapi kok bisa, pajabat nan baru dilantik tu, yo
bisa mambao parubahan kaarah nan labiah baik untuak Kabupaten Solok. Wak tunggu
terobosan jo inovasi urang-urang tu untuak Kabupaten Solok nan labiah baik.
Salin tu, kok bisa yo amanah handaknyo,” jaleh Andy Bule, nan kini matonyo
tatuju ka tivi, nan sadang mambaritakan Ahok dibela 100 pengacara tentang kasus
dugaan penistaan agamo.
“Itulah
bedonyo urang kini jo urang dulu, nakan! Kok urang kini nak dapek jabatan, jiko
paralu manyogok. Tapi urang dulu kalau diagiah jabatan, nyo langsuang manangih,
apokoh akan sanggup mamikul jabatan itu atau indak. Sabek kalau indak amanah
kalau diagiah jabatan, mako dunia akhirek cilako. Di dunia ko bisa baurusan jo
hukum, di akherat bisa masuak narako pulo. Iyo sabana barek!,” jaleh Mak Malim,
sambia mambaka rokok karetek nan dari tadi masih diputa-puta ditangannyo. “Kini
awak baharok dan baparasangko elok se ka apak-apak atau ibuk-ibuk nan baru
dilantik tu. Awak sabagai dunsanak, hanyo bisa maingekan sajo. Jadi pejabat tu
adolah amanah dan jan talalu laruik jo gadang ati. Tapi kok indak amuah
dinasehati, tunggu selah azab Tuhan tu amek padiah,” ucek Andy Bule, nan
matonyo masih tatuju ka layar tivi nan masih sibuk mambahas aksi demo damai nan
barakir rusuih tanggal ampek November kapatang***
No comments:
Write komentar