Nan Angek Carito Mutasi

WANDY

Nan Angek Carito Mutasi

            “Carito apo nan sadang angek di Kabupaten Solok ko kini, Ndy? Amak alah lamo indak baco Koran, sabek amak alah saminggu sibuk mamparalekan kopanakan amak nan pulang dari Jawa patangko,” kecek Mak Malin Sampono, mambuka ota di lapau politik milik Da Indra, muko kantua Bupati Solok, Rabu sore kapatang.

            “Banyak carito nan angek mah Mak dalam saminggu ko. Misalnyo masalah proyek nan alun jaleh duduak tagaknyo, masalah persiapan TdS nan Kabupaten Solok akan jadi tuan rumah pembukaan atau kecek urang Grand Opening dan Grand Star nan katonyo akan digelar pawai budaya dari Kayu Aro manuju Dermaga Singkarak. Tapi sampai kini masih santai-santai juo, padohal waktu pelaksanaan TdS tinggal sekitar sapuluah hari lai,” kecek Andy Bule, manjawek pertanyaan Mak Malin Sampono. “Kalau itu indak carito angek bagai do, Ndy! TdS tu bialah nyo urus dek Dinas Pariwisata, sabek kalau wak sato, indak juo kadidangaan do. Maksud amak carito isu politik seperti Kudeta nan tajadi di negara Turki tu,” sambuang Mak Malin Sampono, sambia mangacau kopi nan baru dipasannyo. “Kalau carito sarupo di Turki tu jan sampai tajadi pulo di negara awak ko, Mak! Kok amak batanyo carito nan angek, awak danga banyak pejabat eselon II dan III nan alah maleh masuak kantua. Sabek dalam wakatu dakekko akan ado mutasi gadang-gadangan, sarupo nan awak baco di KORAN PADANG tabitan patang,” jawek Andy Bule, sambia mambaleh Catting di WAnyo, sabek kawannyo nan di Batam mananyoan harago bareh Solok jenis sokan naik di Batam.

            “Nah, kalau carito mutasi ko baru carito angek, mah Ndy. Amak danga, banyak pejabat nan masih panik apokoh dirinyo masih dipakai atau indak dek Bupati atau Wakil Bupati. Nan banyak binguang amak caliak, nan kapalo SKPD nan indak mandukuang patang, tapi kini kecek urang apak-apak tu bi malu-malu kuciang ka Bupati. Kabanyo adolo nan tarang tarangan minta jabatan,” kecek Mak Malin Sampono, sambia mambaka rokok kretek kesukannyo. “Awak raso Bupati alah tau sia urang nan basamo baliau sajak awal dan indak usah pulo awak cikaroi. Tapi itulah dunia, Mak, mancari mungko dan marayu-rayu itu biaso mah. Nan jaleh pemimpin awak indak urang bodoh do. Kok bisa, iyo sarupo kecek Mak Datuak Yem patang, nan Kapalo SKPD iyo urang asli Solok nan diutamokan, agar indak tajadi kecemburuan sosial. Sudah tu urang tu berwawasan nan menguasai dimanyo kadiduduakan. Jan sampai sarjana pertanian di angkek pulo jadi Kadis Pekerjaan Umum atau sabaliknyo, sarupo nan tajadi di Kabupaten lain. Dan indak asa dakek se do,” cetus Andy Bule, sambia sibuk mambaleh WA dari kawannyo nan di Batam tu. “Kalau usulan amak rancak nah. Sudah tu bak kecek Ketua LKAAM awak di Koran Padang, tim sukses yang mampu untuk jadi kepala SKPD harus di utamakan. Jan mereka alah bajuang siang malam, tapi kini dicampakan,” kecek Mak Malin Sampono, sambia manyambuang rokoknyo nan alah tapuntuang.

            “Masalah mutasi, rotasi dan promosi serta degradasi, wak sarahkan se ka Bupati jo Wakil Bupati. Karajo awak selah nan kadiurus. Maota banalah wak kini di lapau ko, nan apak Bupati nan tingga di rumahnyo indak juo kamandanga awak do,” sela Astra nan dari tadi sibuk mamikian kuda hitamnyo yang sadang taancam di papan catua dek pion Da Indra. “Alah anok selah ang Astra, iko carito urang gadang-gadang mah. Indak tamakan dek utang ang do,” baleh Andy Bule ka Astra, nan diikuti galak-galak ketek dek urang saisi lapau***