OLEH: WANDY
Takicuah Dinantarang
“Baa
kok buruak bana manuang Amak kini ko. Apo ko gerangan nan tajadi, apo amak
sadang sakik atau sadang ado masalah jo mintuo ambo di rumah?,” tanyo Andy
Bule, ka Mak Malin Sampono, sarupo biaso mamulai ota katiko duduak-duduak di
lapau politik milik Da Indra nan indak jauah dari Tugu Ayam, muko kantua Bupati
Solok, Rabu kapatang.
“Baa
lo kok indak kaburuak manuang amak dek nakan, ko!. Amak manunggu urang kamambayia
utang, keceknyo hari kini kadibayianyo. Tapi alah nak tabanam lo matoari, nan
puncak iduang urang tu alun juo tampak lai. Padohal sajak patang alah tigo kali
mungkie. Mano Hapenyo dimatian pulo. Itu kan pitih dapua jatah mintuo nakan nan
amak salangan ka urang tu. Keceknyo hanyo duo tigo hari. Tapi sampai kini alah
tigo pakan alun juo nyo bayia lai. Dan hari kini yo bajanji lo kamambayia bana.
Tapi nyatonyo alun juo tibo lai,” jawek Mak Malin Sampono, nan wajahnyo tampak
muruang dek manunggu urang kamambayia utang. “Andeh, Mak! Kok manunggu urang
kamambayia utang nan amak arokan, itu iyolah takicuah di nan tarang amak nah.
Urang kiniko, wakatu maminjam iyo lunak gigi dari pado lidah. Tapi alah dapek
kandaknyo, inyo akan maleh bayia utang alias purapura indak tau se. Nan labiah
anehnyo, awak nan malu basobok jo inyo. Tapi kok urang tu niek kamambayia,
indak paralu amak manunggu sampai seso lo dek pitih surang. Kok bisa lain kali,
yo caliak-caliak bana urang nan kadisalangan pitih lu mak!,” kecek Andy Bile
satngah bapasan ka Mak Malin Sampono, nan sarupo biaso, tangannyo sibuk
mamencet hape, mambaleh WA dari kawannyo nan tingga di Jakarta nan mananyoan
ikan bilih dari Danau Singkarak kok alah mulai jarang ado di pasa. “Itulah
nakan! Urang tu mambana datang katampek mak, kaonyo inyo paralu pitih untuak
mambayia julo-julo. Sapakan inyo kamambaliakan pitih amak, sabeknyo kadapek
julo-julo. Tapi alah hampia tigo pakan, pitih amak alun juo nyo pulangan lai.
Padohal amak ka paralu pitih untuak mintua nakan. Kok indak di pulangannyo,
bisa-bisa dapua indak baraso dan mintuo nakan pasti mambalakang lalok ka mamk,”
garah Mak Malin Sampono, nan mulai galak ketek dek takana kebiasaan bininyo
kalau talambek maagiah pitih balanjo akan basikap monyong kayak bemo Mandra nan
ado di Film Si Doel Anak Sekolahan.
“Urang
kini banyak nan diagiah kaepercayan barkianat, mak! Kalau bajanji acok maleset
dan bakato suko baduto. Dikecekan munafik, bekonyo berang pulo ka awak. Padohal
itu agamo nan mangatoan. Kalau urang nan manyalang pitih tu jujur, pasti alah
tibo maantaan ka amak. Kok urang Islam bukan kafia, nan dipacik yo keceknyo.
Kok indak, alah samo jo nan bakaki ampek nah, Mak!,” baleh Andy Bule, nan tabao
lo esmosi dek ibo mancaliak Mak Malin Sampono. “Aalah, masak dek pitih awaak
surang, kapalo awak lo nan pusiang. Makonyo lain kali kok ado nan manyalang
pitih, caliak-caliak bana urang lu, Mak! Kok manyalang pasti wajah urang tu
sedih kayak di sinetron-sinetron mah. Giliran mamulangan, ogah. Makonyo lain
kali, kok ado juo rang nan manyalang pitih amak, kecekan sajo indak ado lai!
Bialah dikecekan urang pilik, dari pado awak sangsaro dek harato awak surang,”
sela Astra nan dari tadi sibuk main catua jo Da Indra sipemilik kadai. “Iyo nah
Astra, sabanyo ati kaciak amak juo mangecekan barek manyalangan ka urang tu.
Tapi dek raso ibo dan inyo manyalang sabanta, amak tantu paco yo sen. Tapi kini
inyo pamainkan pulo amak. Olala lai nakan!,” jawek Mak Malin Sampono sambia
mambaka rokok kretek kasukaannyo, nan dari tadi di puta-puta se ditangan
kanannyo***
No comments:
Write komentar