Tuhan Babuek Sakandak Ati

WANDY

Tuhan Babuek Sakandak Ati

            “Mak, dalam babarapo hari tarakirko, yo alah banyak bana musibah nan tajadi di daerah awak. Apo iko manandoan hari alah dakek ka kiamek, Mak?,” tanyo Andy Bule, ka Mak Malin Sampono, sarupo biaso wakatu duduak di lapau politik milik Da Indra, kawasan Kayu Aro, ibukota Kabupaten Solok, Rabu sore kapatang.

            “Itulah, Ndy! Tuhan Sang Panguaso langik jo bumi dan sagalo isinyo, babuek sakahandak hati baliau. Sagalo musibah nan tajadi di Kaupaten Solok ko, baik musibah tanah longsor, angin kancang, hujan badai jo kecelakaan oto nan mangakibabkan dunsanak awak maningga, kasadonyo atas kahandak beliau juo. Manusia buliah barancana, tapi Tuhan nan manantukan sagalonyo,” jawek Mak Malin Sampono, nan dari raut wajahnyo masih taliek raut muruang, karano di nagari nan balaiu cintaiko dalam sabulanko, musibah tajadi siliah baganti. Bahkan alun kariang aia mato kecelakaan oto, alah tajadi lo tanah longsor jo ratusan atok rumah warga sarato kayu gadang barabahan. Ditambah pulo, Mak Malin Sampono agak ibo hatinyo mancaliak anggota dewannyo baselfie-selfie ria di lua kota di medsos, samantaro di facebook walinagari labiah banyak manfosting foto korban longsor. Dalam hati Mak Malin Sampono batanyo-tanyo, kamano painyo nurani anggota dewan yang katonyo wakil rakyat tu?. “Nan jaleh, iko pasti teguran ka awak nan masih idueikko yo, Mak! Intinyo bana, awak harus salalu mampasiapkan diri satiok saat, mancari bekal untuak kampuang akherat. Duniako hanyo ibarat palabuhan pasinggahan untuak manuju kampuang nan akherat tadi. Makonyo sabalun  kapa barangkek, awak cari bekal banyak-banyak, supayo awak salamaek dunia manuju kampuang akherat tadi. Itu kecek para ustad dan guru awak mah, Mak!,” baleh Andy Bule, sambia mambaco Koran Padang nan alah manjadi bacaan rutinnyo di lapau politik milik Da Indra. “Kalau itu bana mah, Ndy! Nan paralu bana, ijan lupo mamparsiapkan diri awak jo karajo nan elok-elok sen. Jan suko bagunjiang, mancilok punyo urang, maambiak pitih negara, mesti indak ado nan mancaliak. Tapi Tuhan pasti akan tau. Kok malang beko kan hanyo sakijok mato. Jadi, intinyo awak harus iduik bapadoman ka agamo. Agar indak tajadi salah jalan. Beko nan kamanyasa awak juo surangyo,” tarang Mak Malin Sampono, sambia maisok rokok kreeknyo dalam-dalam. “Kok itu iyo batua bana mah, Mak! Tapi alah mode iko musibah nan tajadi, kok masih banyak para dunsanak awak nan saolah indak paduli jo tando-ando alamko. Apo mungkin pintu ati para dunsanak awak tu alah tatutuik. Atau urang labiah paralu jo harato dari pado raso-raso. Kadang urang Minang kini indak mangarati lai jo ereng dan jo gendeng. Alah kalah  lo dek urang Jawa, Mak!. Tapi nan jaleh awak nan mangaratiko, jan sampai bosan lo maingekkan para dunsanak awak nan mungkin sadang kilaf tu,” kecek Andy Bule,sambia mambuka HP Androidnyo nan baru babunyi, dari kawannyo di Banten nan mananyoan lai indak ado musibah baru nan tajadi di kampuang.

            “Alah, manga pulo awak nan kasibuk mamikian musibah nan tajadi tu. Sadang Dinas BPBD awak se nan alah ditunjuak karajonyo khusus untuak menngani bencana tu, indak paduli. Labiah rancak karajo awak se nan diurus. Maojeksambia maantaan anak-anak pai sakola. Sudah tu kalau alah patang hari main catue sambia maasah utak,” sela Astra, nan sarupo biaso sibuk main catue jo Da Indra. “Yo tapi baa kabaa, awak harus paduli sasamo awak, Astra. Indak bisa awak iduik surang se do. Awak pasti butuh urang lain,” jawek Mak Malin Sampono nan minta pamit pulang, sabek bininyo tersayang alah manalepon***