Indak Nyambuang.......

OLEH: WANDY

Indak Nyambuang.......

          “AWAK baco di KORAN PADANG hari kini, kabanyo banyak mantari nan akan diganti. Kalau baitu awak satuju bana mah, sabek  banyak dari apak-apak tu nan indak tau fungsi dan tugasnyo,”  ujar Astra, seorang staf walinagari, katiko bacarito seusai makan lontong di lapau Si Iyen, kawasan Bukik Gompong, Rabu Siang kapatang.

            “Batue itu mah Astra, awak caliak negara awak ko yo sabana kacau balau. Indak masalah partai se nan duo pemimpinannyo do. Masalah sepakbola sebagai olahraga rakyat, kabanyo alah centang parenang lo. Andeh, pusiang awak dek inyo. Kalau mode tu se taruih, takana awak zaman Pak Harto, negara ko aman. Urang indak barani asa mangecek se do,” jawek Andi bule, seorang tokoh Partai Politik tanamo di Kabupaten bumi penghasil bareh tanamo tu. “Kalau bisa, awak baliak ka zaman pak Harto, yo sabanan aman negara ko. Meski manuruik isu nan di danga, banyak kroni beliau nan korupsi, tapi negara aman. Kan iyo dek Uda Andi tu,” jawek Astra kembali. “Kalau masalah korupsi, sampai bilo se di negara awak ko indak akan punah do. Kok ado KPK nan manangkok, KPK tu akan ditangkok urang pulo. Jadi yo kasinan riumik kamari bedo jadinyo,” kecek Andi Bule.

            “Ambo danga tadi ado mantari ka diganti. Rancak itu mah! Mantari nan kiniko alah agak banyak tingkahnyo. Patang jawi ambo lah minta bana untuek disuntik hamil, keceknyo ubeknyo habis. Tigo bulan nan lalu mode tu pulo, tapi keceknyo mantari tu sadang pulang kampuang ka Pasisie. Mantari nan surang lai alasannyo bininyo baranak ketek. Ondeh, padohal awak lamo manunggu maso jawi tu biar kandungannyo subur. Kalau mantari  hewan tu indak disiplin, nan taniayo kami para peternak jawi. Nan bedo bana, jawi alah gadang, dimaliang pulo dek urang,” sambuang Mak Kusim, nan dari tadi asyik mandanga Astra bicara masalah pergantian menteri Kabinet Jokowo. Tapi dek Mak Kusim kurang faham, dikecekannyo mantari hewan nan batugas di kecamatan ko nan kabaganti. “Andeh, indak nyambuang amak Kusim ko do mah. Nan kadiganti itu menteri di pusat. Bukan mantari suntik hewan. Kalau kamangganti mantari suntik hewan tu, datang selah ka Dinas Peternakan, laporkan keluhan amak disitu,” kecek Andi Bule, agak sedikit kesal mandanga Mak Kutar manyolo pembicaraan, tapi indak nyambuang pulo.

            “Nan pentiang bana, jan sampai awak di daerah ko sato panik mamikian komplik di pusat tu. Apolai dek bakacamuek duoalisme kepemimpinan Partai Golkar dan Partai PPP nan sampai kini indak ado kapastian, mako kader-kader partai dari duo partai tu nan akan maju menjadi Bakal Calon Walikota dan Bupati, kini jadi tahambek langkahnyo. Sabek kalau malamar ka partai lain, urang-urang tu alah punyo kader tersenediri. Kan nan rugi urang daerah dek komplik elit di pusatko. Disurueh islah, urang tu gengsi,” terang Astra, sambia mamasan kopi panas, sabek carito makin sore makin angek, saangek kopi panas nan baru dipasan Astra. “Ondeh, yolah sabana santiang waang kini Astra. Padohal baru duo bulan awak indak batamu. Ko dek acok baco berita politik jo di KORAN PADANG mah. Tapi nan jaleh bana, awak urang daerah, indak usah pulo panik mamikian kacau balau di pusat tu. Kan alah ado presiden nan maurus,” sela Andi Bule, sambia maangkek telephon BBnyo, nan baru babunyi. “Sorry Astra, ambo pamit duluan, anak ambo minta dijapuik baru pulang dari baraja sore. Sabek akan mengikuti ujian kenaikan kelas bulan di mungko ko,” jelas Andi Bule, sambia langsuang badiri***