Dunia Alah Dakek Ka Kiamek

WANDY

Dunia Alah Dakek Ka Kiamek

            “Iyolah samakin dakek duniako akan kiamek mah, Ndy! Caliaklah tando-tando alam, alah tiok sabanta se tajadi musibah nan seharusnyo menjadi pelajaran dek awak basamo. Rancak bi batobatlah awak lai sabalun talambek,” kecek Mak Malin Sampono ka Andy Bule, mambukak ota di lapau politik milik Da Indra, kawasan Kayu Aro, Ibukota Kabupaten Solok, Rabu kapatang.

            “Iyo mah, Mak Malin! Alah babagai sen nan awak danga zaman kiniko. Tapi dunsanak-dunsanak awak indak juo bi arif do. Urang kini alah banyak bana nan mambilakang ka Kiblat lah basibanak ba sipakak se. Awak samo awak se alah banyak nan batangka, alah kalah nafsu dek aka,” jawek Andy Bule, sambia manyemba Roti abuh hijau nan alah manjadi kasukaannyo sajak babarapo bulan tarakhir. “Cubolah baco koran atau nonton tivi, alah babagai se nan awak caliak. Nan dulu sangek tabu awak danga, kini alah manjadi biaso se dek urang. Sudah tu narkoba alah marajalela, perjudian di mana-mana, maksiat mode tu lo. Anak gadih alah bacampue se jo anak bujang, ado jawi nan baranak sabantuak jo urang, musibah badai di mano-mano, kecelakaan tiok sabanta, apak mahamili anaknyo, bini urang bini awak juo dan lain sebagainyo. Iko kan alah ado dalam Al Qur’an kalau alah bantuak tu kajadiannyo, itu alah masuak tando-tando ka kiamek mah,” tarang Mak Malin Sampono, sambia manyalokan rokok kretek kasukaannyo. “Batua bana mah, Mak Malin! Nan paralu bana awak jago tantu diri awak jo keluarga dulu. Sudah tu baru wak ingekan ka dunsanak jo tetangga awak. Jan sampai awak tamasuak urang nan marugi hiduik di dunia ko,” ujar Andy Bule sambia mambaco kekalahan Semen Padang dari Mitra Kukar di Harian KORAN PADANG.

            “Amak lai bangga jo anak mudo sarupo Andy ko. Walaupun sakola indak tinggi-tinggi bana, tapi Andy alah punyo bekal nan cukuik untuk menghadapi hidup. Awak boleh bergaul dengan siapapun, tapi kalau alah kecek jo perbuatan alah kalua dari rel Agamo, rancak awak mailak. Apolai kini ado aliran sesat kecek MUI dan dilarang dek Mendagri, seperti Gerakan Fajar Nusantara alias Gafatar. Kabanyo aliran Gafatar tu indak paralu baibadah do. Maa pulo ado ajaran Islam mode tu. Supayo awak jan salah langkah, bapadoman selah ka Al-Qur’an dan Hadist Nabi. Dijamin hiduik salamek dunia kaherat,” tutur Mak Malin Sampono agak panjang leba.

            “Setuju bana mah, Mak Malin! Kalau awak lah bapadoman ka Al Qur’an dan Hadist Nabi, pasti awak indak akan salah langkah bagai do. Urang kini banyak nan bapadoman ka urang bapangkek, ka angko BT atau lai sabagainyo. Urang mancari manantu kini mode tu lo. Nan ditanyo indak masalah agamonyo do, tapi di manyo karajo dan bara penghasilannyo. Kalau dulu urang mancari minantu kan ditanyo dulu baa agamo dan moral calon mantu, sudah tu baru di ma karajo dan lain sabagainyo. Jadi iyolah samakin dakek dunia ko ka kiamek mah, Mak Malin,” cetus Andy Bule.

            “Iyolah, Ndy! Amak kini kan alah gaek. Jadi amak bapasan ka Andy jo para pajabat esselon duo dan tigo serta seterusnyo, kok bisa meski kini awak kapunyo Bupati dan Wakil Bupati baru, namun jan sampai awak marandahan diri untuk mendapatkan sesuatu jabatan, tapi rendahkanlah hati kita untuk memberikan sesuatu yang bermanfaat bagi orang banyak,” sambuang Mak Malin Sampono.

            “Okelah, Mak Mali! Tarimokasih nasehatnyo, awak pai manjapuik anak ciek lu pulang mangaji di surau sabalah,” kato Andy Bule sambia mangucapkan salam, nan dijawek dek Mak Malin jo saisi lapau dengan Wa’alaikum salam, hampia sarentak!***