Atlet Dayuang Manggok

WANDY

Atlet Dayuang Manggok

            “Ndy, amak danga dari carito urang, kabanyo tim dayuang Porprov awak mamanggok dan pulang labiah capek dari pado cabang olahraga lain dari Padang, apo kolah panyabeknyo tu, nakan, kok bisa mamanggok mode tu?,” tanyo Mak Malin Sampono, sarupo hari biaso wakatu mambuka ota di lapau milik Da Indra, muko kantua Bupati Arosuka.

            “Batua itu, Mak Malin. Kabanyo kecek palatiah dayung tu,  atletnyo kurang diperhatikan dek KONInyo, Mak!. Tapi kecek urang KONI nan awak baco di KORAN PADANG, inyo indak pernah maanak tirikan cabang olahraga do. Antah sia nan batua atau nan salah, nan jaleh ulah tim dayuang tu alah jaleh mancorengkan arang di kaniang Kabupaten Solok mah, Mak!,” jawek Andy Bule, sambia tangannyo sibuk mamencet tuts HP mambaleh WA dari kawannyo nan pai demo pembelaan agama ka Jakarta. “Kurang diparatian baa ko nakan, apo tim dayuang tu indak dapek jatah sarupo cabang olahraga lain. Atau pitih tu alah dimakan dek pangurusnyo sajo,” tarang Mak Malin makin panasaran dek carito Andy Bule. “Kok masalahh tu yo ndak tau awak do Mak Malin. Labiah rancak ditanyo se kapalatih atau pangurus dayuang tu, apo inyo indak dapek uang saku wakatu di Padang atau pitih nan diagiah dek KONI tu alahnyo makan se dek palatihnyo,” jawek Andy Bule nan matonyo sibuk kalayar handphone manunggu baleh WA dari kawannyo tu.

            “Kok bisa, urang olahraga tu yo barsikap jentelmen atau manjunjuang sikek sportivitas nan tinggi handaknyo. Kok ado masah, kan labiah rancak dibicarakan elok-elok jo KONI. Hari gini kok  masih manggo-manggok, malu dong samo anak PAUD,” jaleh Mak Malin Sampono dengan bahasa gaulnya. “Tapi kalau awak sadari lo, tantu ado lasan tim dayuang tu pulang labiah dulu dari Padang. Bisa se salamoko memang KONI indak mamparatikannyo atau ado palatiah nan batinnyo tasakik dek pengurus KONI, awak kan idak tau do,” jaleh Andy Bule. “Itu batua nakan, kok rancak kan pai ka Padang basamo-samo, pulangnyo tantu harus basamo pulo. Kok ado masalah, beko alah bakumpua baru dicarikan solusinyo. Tapi kok mode kapatang tu, nan pasti nan kadapek malu jaleh Kabupaten Solok juo. Sabek di koran-koran alah rami mambaritakan. Itupun alun tamasuak nan di posting di Facebuk jo ota di lapau-lapau lai,” jaleh Mak Malin Sampono sambia mambaka rokok nan dari tadi masih diputa-puta ditangannyo.

            “Iyolah Mak Malin, kok bisa masalah tim dayuang jo KONI ko capek salasai. Jan sampai balaruik-laruik lo, sarupo persoalan nan tajadi di tubuah KONI kapatangko,” baleh Andy Bule. “Aaalah, manga pulo urusan urang awak cikaroi, rancak karajo awak se di urus. Masalah KONI jo tim dayuang tu indak kasalasai dek ota lapau ko do,” sela Astra, nan dari tadi sibuk nonton tivi para ormas bajalan kaki manuju Jakarta. Biasonyo Astra main catue jo Da Indra, tapi dek Da Indra ado paralu manjapuik anaknyo ka Bandara Minangkabau, tapaso Astra manonton tivi se di lapau sambia manunggu Da Indra Pulang. “Tonton sela tivi tu dek waang, carito kami ko indak tamakan bagai dek utang ang do,” baleh Andy Bule ka Astra nan diikuti suaro galak gadang dek Mak Malin Sampono***