Uda Bule Gilo

WANDY

Uda Bule Gilo

            “IYO sabana kancang uda bule tu mangayuah sapeda, Mak Malin! Sakijok mato, alah ilang senyo dari pancaliakan awak. Yo bana kecek amak mah, labiah kancang dari oto Jasa Malindo jurusan Padang Solok nan acok malinteh di Kayu Aroko!,” kecek Andy Bule, ka Mak Malin Sampono, mambukak ota di lapau politik milik Da Indra, Kawasan Kayu Aro, Rabu siang kapatang.

            “Ntu lai pai nakan ka Dermaga Singkarak mancaliak pambukaan TdS ko hari Sabtu kapatang du?,” tanyo Mak Malin Sampono, baliak batanyo Ka Andy Bule, sambia matonyo tatuju ka layar inews Tivi, nan sadang mamberitakan sengitnyo persaingan Calon Presiden Amerika dari Partai Demokrat, pangganti Uda Barak Obama, yakni uni Hillary Clinton dengan apak Donald Trump. “Tantu lai painyo, Mak! Awak tapaso manonton Grand Star tu dari tapi Danau Singkarak, sabek yo sabana sasak urang manonton di Dermaga tampek pambukaan tu,” jawek Andy Bule, nan tangannyo indak lapeh dari HP untuak mambaleh WA dari kawannyo dari Solok Selatan, mananyoan sia juara Etape ka Limo TdS yang satrt dari Pesisir Selatan menuju Padang Pariaman tahun 2016 ko, sabek ka Solok Selatan Tahun kiniko TdS indak masuak do, karano kondisi jalan nan rusak parah. “Kalau dunsanak awak dari lua nagari tu bisa kancang mambao sapeda, karano urang tu alah talatiah dan disiplin. Sudah tu makannyo juo bagizi dan latihan juo teratur. Indak sarupo atlet balap sepada di negara awak do, bisuak kabatandiang, kini baru latihan. Dimalo indak ka kambang kampih nafas dek inyo,” tarang Mak Malin Sampono, sambia mahiruk rokok kreteknyo dalam-dalam. “Tapi awak paratian bana, baa kok bisa urang bule ko mangayuah sapeda sacapek kilek. Bahkan dipanurunan, masihnyo kayuah juo sapeda tu kancang-kancang. Pokoknyo yo sabana gilo karajo dunsanak awak nan dari lua nagari tu,” sambuang Andy Bule, nan jari tangannyo masih tatek mamencet tuts HP untuak mambaleh WA dari kawannyo dari Solok Selatan tu. “Tapi alah amak caritoan ka Andy, kalau urang bule tu alah bana-bana profesional dalam sagalo hal. Tamasuak dalam balap sepeda ko. Intinyo negara awak kalau nak maju di olahraga, contohlah ka negara Barat. Tapi kalau nak mantap baagamo, contohlah negara Turki atau negara-negara Arab,” sambuang Mak Malin Sampono nan baliau tamasuak urang tigo zaman nan faham jo ilmu pengetahuan.

            “Iyo batua kecek amak Malin Sampono tu mah, Ndy! Kok nak baraja olahraga, baiak balap sepeda atau sepakbola, pailah ka Eropah. Tapi kalau nak baraja main catur, barajaselah ka awak,” sela Astra nan asyik main catur basamo da Indra. “Baa lo kabaraja ka ang tu, sapuluah kali main, sakali manang, sisonyo kalah selai,” jawek Andy Bule sacapek kilek, lapiah capek lo dari urang bule mangayuah sapeda tu lai***