Saran Untuak Bupati

WANDY

Saran Untuak Bupati

            “MAK, awak yo ado uneg-uneg nan kadisampaian ka apak Bupati jo Wakil Bupati dalam manunjuak Kapalo SKPD atau sususnan Kabinet nan kabaliau bantuak bisuakko. Kok bisa saran awak, apak Bupati jan sampai salah manampekan urang dalam kabinet baliau limo tahun kamuko,” kecek Andy Bule ka Mak Malin Sampono, mambuka ota di lapau politik milik Da Indra, kawasan Kayu Aro, Rabu kapatang.

            “Iyo mah, Ndy! Meskipun hal itu adolah hak mutlak Bupati jo Wakil Bupati, namun sekedar saran atau masukan indak ado masalahnyo do. Nan pentiang bana, tampekanlah urang-urang nan berkompeten sasuai bidangnyo masiang-masiang. Kok apak tu sakola jurusan pertanian, jan dilatakan pulo di Dinas Pendidikan atau kalau inyo dari guru, jan diangkek pulo jadi Kapalo Dinas Kesehatan atau lain sabagainyo,” jawek Mak Malin Sampono, sambia mambaka rokok keretek kasasukaannyo. “Kok iitu awak lai sapandapek jo Amak Malin nah. Demi Kabupaten Solok nan awak cintoi ko, Bupati jo Wakil Bupati harus bisa mandanga suaro hati warganyo, sia kiro-kiro Kapalo SKPD, Kabid atau Kasi nan pantas untuak manduduki jabatan itu. Bialah urang tu indak sato mamiliah atau mandukuang waktu Pilkada patangko, namun asal mampu dan bisa bekerjasama dalam satu tim paralu dipatimbangkan,” balas Andy Bule, nan tangannyo sibuk mambaleh pesan BBM dari kawan-kawannyo, nan minta dimaafkan karano puaso akan masuak.

            “Karajo samo dalam satu tim baa maksud Andy ko?. Apo salamoko para SKPD tu indak kompak?,” tanyo Mak Malin Sampono, sambia manyambuan rokoknyo karano alah tapuntuang. “Itulah masalahnyo, Mak! Awak danga salamoko, antaro atasan di sebuah SKPD indak saliang kompok. Mereka salian mancari kasalahan pimpinan. Kok bisa para staf bakarajo mambantu Kasi dan Kasi saiyo lo jo Kabag dan para Kabag kompaklo jo Sekretaris atau Kadis. Tapi salamo limo tahunko, komunikasi sarupo itu nan indak jalan. Artinyo Kpalo SKPD banyak nan maraso hebat dan indak pandailo mamenej bawahan. Dilain pihak bawahan atau para Kasi dan para Kabag indaklo patuah kaatasan. Sudah tu para kapalo SKPD iyo bana-bana bakarajo mambantu tugas Bupati. Indak manggunjiangan atasanyo karajo do,” tarang Andy Bule panjang leba. “Kokitu yolai amak danga pulo mah. Makonyo, jadikan hal itu pangalaman dek Bupati dalam manyusun kabinet. Tanyoan dulu kaseriusan urang tu sabalum dilantik. Apoko mau bekerjasama dalam tim dan kalau indak berani mundur,” cetus Mak Malin Sampono.

            “Baa lo urang tu ka amuah mundur, kok jadi Kadis kan dapek oto jo sopir plus bon minyak. Sudah tu bisa lo pai kalua daerah tiok sabanta sarupo anggota dewan. Kapalo SKPD tu kan acok pulo kalua daerah. Inyo indak katara bana dek wartawan jo LSM, sabek pai hanyo acok surang-surang. Kok dewan jaleh pai kalua daerahnyo dek basamo-samo,” seruduk Astra nan sarupo biaso sadang serius main catur sama Da Indra, sipemilik lapau politik. “Alah, sok tau lo ang mah, Astra. Nan acok pai kalua rumah tu waang, sabek bini ang banyak,” jawek Andy Bule nan disambut galak tawa sek saisi lapau nan hadir***