“Kabanyo
mulai tanggal limo Desember bisuak alah Minggu tanang yo, Mak?,” tanyo Andy
Bule, ka Mak Malin Sampono, mambuka ota, katiko duduak-duduak di lapau politik
milik Da Indra, Kawasan Kayu Aro Rabu kapatang.
“Kalau ndak salah, tanggal limo tu jatuehnyo hari Sabtu mah, Ndy! Tanggal
anamnyo baru hari Minggu. Baa utak ang ko, masih mudo, tapi alah mulai
tulalit,” jawek Mak Malin Sampono, sambia mahituang tanggal baraso hari Rabu
kiniko baru tanggal 2 Desmeber. “Maksud awak tu Minggu tanang ka Pilkada Mak
Malin. Dimano mulai hari tu, indak dibolehkan lagi para calon Bupati dan
Wakil Bupati bakampanye sampai tanggal 9 Desember sasuai aturan nannyo
buek dek KPU,” tarang Andy Bule agak kesal mandangaan jawek Mak Malin Sampono
asa malambai sen. “Oo, Minggu tanang Pilakada maksudnyo, amak kiro Minggu
tanang untuak refresing mananangkan utak. Sabek nan amak tau, satiok Minggu ang
nampak dek amak nongrong di Tugu Ayam, mancaliak urang bafhoto-fhoto jo
bapacaran,” garah Mak Malin lagi ka Andy Bule. “Nan paralu awak awasi basamo, pado
Minggu tanang tu akan ado tim sukses dari calon Bupati dan Wakil Bupati nan ka
mambagi-bagikan pitih untuak calon-calon tatantu. Jadi awak harus waspada!,”
sambuang Andy Bule lagi. “Waspada baa lo maksud angko! Waspada indak sampai
dapek yo?,” ciloteh Mak Malin lagi. “Indak itu maksudnyo do, Mak Malin. Kalau
bisa Pilkada awakko yo barasiah dari politik uang handaknyo. Jadi pemimpin yang
lahir, akan mengurangi korupsi, sabek waktu mancalon inyo indak talalu banyak
bana mangaluan biaya do!,” jawek Andy Bule, nan mulai spaningnyo agak naiak dek
jawek Mak Malin Sampono nan acok batea sen. “Tapi kalau memang ado calon Bupati
atau Wakil Bupati nan mambagi-bagikan pitih, mako pitihnyo ambiak, tapi
urangnyo jan dipiliah. Rugilah awak kalau indak maambiak pitih tu. Kan tibonyo
hanyo sakali limo tahunnyo,” ciloteh Mak Malin Sampono lagi, sambia minta
mamasan kopi pahit indak bagulo ka urang kadai. “Awak binguang lo kini mah,
Mak! Kato pak ustad, manarimo pitih waktu Pilkada dengan imbalan harus mamliah
pasangan tatantu, mako hukumnyo haram Mak. Sabek itu jatuahnyo samo jo sogok.
Dalam Agamo, panyogok jo nan manarimo sogok, samo-samo di narako nanti di
Akherat,” tarang Andy Bule, nan Agamonyo waktu sakola mandapek angko salapan.
“Ondeh, iyolah hebat kamanakan amak kini. Kok mode tu pamikiran waang, tahun
bisuak ko mancalonlah manjadi walinagari lai. Bia amak nan jadi tim suksesnyo,”
tutur Mak Malin Sampono lagi. “Awak tapi indak ado cito-cito untuak manjadi
walinagari do, Mak Malin! Kalau untuak manjadi anggota DPR RI lai nah,” ungkap
Andy Bule ka Mak Malin Sampono. “Baa pulo caritonyo waang kaman calon jadi
Anggota dewan di puasat tu, bapartai se waang indak do. Kok manjadi dewan
Sakola tu lai bisa nah,” kecek Mak Malin Sampono, ka Andy Bule. Meski baduo se
di lapau tu, tapi ota angek se taruih. “Kan sagalo sesuatu tagantuang niek mah,
Mak! Kalau niek elok, akan elok pulo hasilnyo! Mano tau para pengurus Partai tu
malirik awak bisuekko dek mancaliak potensi awak. Tapi kalau awak ka malamar ka
partainyo, biaselah indak mancalon. Sabek kalau dipasoan juo, ciek partai se
kini indak cukuik pitih 1 Milyar inyo mintak do, sarupo carito tim sukses calon
Bupati dan Gubernur kapatangko, untuak mandapek dukungan 1 partai sajo, harus
manggadaian sertifikat tanah ka Bank. Kalo indak, partai tu ma mau mangusuang
awak! Artinyo bak kecek urang mnggaleh, ado uang pasti ado barang, Mak!,”
tarang Andy Bule ka Mak Malin Sampono. “Suko atianglah, nan jaleh amak sangek
satuju kalau ang maju manjadi calon walinagari. Tapi jan manggunoan kakuasaan
waang untuak babuek zolim ka masyarakat. Sabek apo nan waang karajoan akan
menjadi tanggung jawab rang Minang,” jaleh Mak Malin, nan banyak tau carito
para pak wali, kalau lah manjabat raso inyo alah maha segalanya di nagari.
Tamasuek bisa mamindahan proyek nan indak disukoinyo, sabek tando tangannyo
balaku," sindir Mak Malin Sampono. "Okelah Mak Malin, nan jaleh,
tanggal 9 Desember hari Rabu jatuhnyo, jan sampai lupo Mak Malin datang ka TPS
untuak mamiliah calon Bupati dan Gubernur, jan lupo, harinyo jatuah pado hari
Rabu," jaleh Andy Bule ka Mak Malin Sampono maakhiri***
No comments:
Write komentar