Maleh Bayia Utang

WANDY

Maleh Bayia Utang

            “APO nan waang pikian, Ndy. Dari tadi amak caliak buruak bana manuang ang. Ado go masalah jo rang rumah?,” tanyo Mak Malin Sampono ka Andy Bule, karano indak sarupo biasonyo Mak Malin Mancaliak manuang Andy Bule sarupo urang habih kamatian bini.

            “Indak ado masalah jo urang rumah do, Mak! Cuman awak indak habih pikia, baa kok managih utang ka urang-urang tu susahnyo minta ampun. Indak samudah wakatunyo maminjam dulu do, lunak gigi dari pado lidah,” jawek Andy Bule, manarangkan masalah apo nan sadang dipikiakannyo. “Oo, kok masalah managih utang tu yo sabana pakaro rumik mah, Ndy!. Amak sendiri acok lo mengalami hal nan samo jo Andy mah. Sarupo waktu maminjam janji sabulan, alah satahun alun juo babayia lai. Sudah tu urang tu mahilang-ilang se. Kok batamu jo awaknyo mailak lo. Pokoknyo saribu satu caronyo menghindar,” sabuk Mak Malin Sampono dengan bahasa khas Soloknyo, sambia mambaka rokok kretek kesukaannyo. “Awak iyo sangek paralu pitih tu, Mak. Minggu bisuak adik awak kabaralek. Dulu nan wak salangan ado pitih untuak jatah dapua bagai mah. Awk dek ibo jo urang tu. Tapi kini awak pikia, alah samo lo awak jo manolong anjiang tasapik, sudah ditolongnyo gigik lo awak. Kok basobok jo awak, urang tu gayanyo acua se. Malah awak nan malu basobok jo inyo,” jaleh Andy Bule agak galak-galak rusuah mamikian pitihnyo di urang.

            “Kalau itu alah sifat kabanyakan urang nan maleh mambayia utang mah, Ndy! Padohal kalau urang nan barutang tu sadar bahwa sampainyo mati indak bayia utang, mako arwahnyo kecek para ulama digantuang antaro langik jo bumi. Bahkan di Padang Masyar nyo kamancari urang nan mautangi mah. Yo sabana barek,” tarang Mak Malin Sampono maniru gaya ustad kondang Zainuddin MZ. “Yo baalah ka aka awak dek amak Malin lai, Kok dipikia bana, dek pitih awak surang, awaklo nan paniang. Nan punyo utang indaklo tau diri do. Kok indak paralu pitih tu dek awak, indak sapaniang iko bana wak do!,” tutur Andy Bule ka Mak Malin Sampono. “Makonyo karajo jan jadi tukang keredit juo. Sudah tu manyalangan pitih ka urang indak bacaliak-caliak bana. Alah jaleh urang kabautang tu indak ado pitih pambayia, basalangan juo pitih. Kok inyo ado pitih, manga lo urang tu kamanyalang ka awak. Kan awak nan tea tu,” sela Astra nan dari tadi sibuk main catua jo pemilik lapau politik Da Indra. “Waang indak mangarati masalahnyo do Astra. Rancak ang urus se bini-bini waang tu. Manga pulo urang lain nan waang urus,” jawek Andy Bule, nan satiok mangecek selalu balawanan jo Astra.

            “Sudahlah, Ndy! Mudah-mudahan urang nan barutang tu dibukakan pintu hatinyo untuak capek mabayia utang sabalun inyo mati. Wak do’akan se semoga pintu hatinyo tabukak,” tutur Mak Malin Sampono mahibur ati Andy Bule***