Bini Pak Dewan Mulai Curiga
“KAPATANG sore bini pak dewan nan tingga disabalah rumah ambo datang karumah untuak curhat jo urang rumah. Keceknyo inyo alah mulai curiga kalakinyo nan tiok sabanta se pai kalua daerah,” kecek Mak Malin Sampono ka Andy Bule, mambuka ota di ‘lapau politik’ milik Da Indra, Kawasan Arosuka, Rabu sore kapatang.
“Mulai curiga baa maksud amak ko. Baujuang kecek amak mah?!,” tanyo Andy Bule satangah panasaran. “Iyo inyo alah mulai mancaliak gaya lakinyo indak seperti dulu lagi. Kalau dulu mintak diuruk tiok malam, minta dibikini teh susu, tapi kini kok alah di rumah langsuangse lalok tanpa minta apo-apo. Alasannyo pak dewan tu kato bininyo pak dewan tu kalatihan pulang karajo,” sambuang Mak Malin Sampono manjawek pertanyaan Andy Bule. “Kalau menurut analisa awak, pak dewan tu indak kalatihan dek karajo do mak. Tapi alah kapanekan dek pai kunjungan karajo alias kunker atau pai study banding mah, Mak!,” sambuang Andy Bule lagi. “Iyo juo mah, Ndy! Kan kalau pai kunker tu banyak nan didapek dan nan dicaliak. Sudah tu panek-panek dek duduak di kapa tabang,” cetus Mak Malin Sampono. “Lho, memangnyo pai study bandiang tu apo sajo nan dibandiangkan tu mak?,” kecek Andy Bule baliak batanyo ka Mak Malin Sampono, nan pernah menjadi anggota dewan Pengganti Antar Waktu (PAW) dari Partai Tambahan Delapan tahun silam. Waktu itu Mak Malin Sampono aktif di partai politik dan ikut lo mancalon, meski dapek suaro hanyo 350 suaro. Tapi baruntuang yang nomor satu terkena kasus pemalsuan biaya rumah makan fiktif, rumah makannyo indak ado, tapi stempeknyo buek se surang. “Study banding tu yo banyak nan dikarajoan. Umpamonyo, baa caro mamungut retribusi daerah dari perparkiran, baa daerah urang bisa rancak jikok dibandiang daerah awak atau juo baa pemerintah daerah urang bisa memaksimalkan pelayanan satu pintu dan lain sebagainyo,” tarang Mak Malin Sampono lagi. “Ooo, mode tu yo, Mak! Apo lai tamasuak mambandiangkan bini nan di rumah jo bini urang di daerah lua tu, Mak?,” ujar Andy Bule sambia tagalak gadang. “Kok itu lah pasti se nah. Namonyo juo study bandiang, harus sadonyo nan dibandiangkan. Kok di daerah urang ado jalan nan balubang di mungko kantuenyo, mangko di daerah awak ko harus ado lo jalan nan balubang, kok bisa labiah gadang lobangnyo dari daerah urang tu. Bia daerah awak ndak kalah,” tarang Mak Malin Sampono. “Kalau itu bagarah-garah amak nah, nan seriuslah. Maksud awak, manga pak dewan tu acok-acok bana kalua daerah, apo nan dicarinyo tu. Kan indak ado nampak hasilnyo untuak daerah awak do?,” jaleh Andy Bule agak kesal dengan jawaban Mak Malin Sampono. “Nan mamulai bagarah tu sia, kan ang dulu. Kok dilapau ko ota indak badangaan bana do, Ndy. Namonyo juo ciloteh lapau, gunonyo untuak bagarah-garah,” sambuang Mak Malin Sampono lagi. “Tapi ado juo urang dek gara-gara bagarah di lapau, akhirnyo lago pageh. Itu namonyo urang nan sampik pikiran mah,” jaleh Andy Bule. “Kalau mode tu, untuang lai ndak ado anggota dewan nan mandanga carito Mak Malin jo Andy tadi. Kok ado tantu alah kalago pagai lo tu,” sela Astra yang dari tadi serius mandanga debat politik antara Mak Malin Sampono dengan Andy Bule. “Tapi anggota dewan awak alah bi pakak sadonyo, suaro rakyat menjerit dek padi dek mancik bawang dek kabuik indak tadanga dek inyolai,” pungkas Astra indak mau kalah***
No comments:
Write komentar