Anak Sikola Gata

OLEH: WANDY

Anak Sikola Gata

“Nampaknyo di nagari awak kini alah samo pulo jo di kota-kota gadang sarupo jo kota Jakarta. Parangai anak sakola alah samakin manjadi-jadi, lah samo pulo jo di Filem-filem barat. Alah barani pulo bapaluakan di tampek umum. Yolah sabana morosot moral anak bangsako,” kecek Mak Malin Sampono, katiko mambuka ota di lapau politik milik Da Indra, Kawasan Arosuka, Rabu kapatang.

“Maksud Mak Malin anak sia nan gata, kok indak ado hujan jo paneh bagai, amak langsuang berang-berang indak manantu,” tanyo Andy Bule, agak saketek takajuk mandanga Mak Malin Sampono, baru tibo langsuang taburangsang. Biasonyo Mak Malin Sampono, minta kopi dulu ka Da Indra, baru mambukak ota. Tapi sakali kiniko, baru tibo di lapau Da Indra, langsuang berang-berang indak bajaleh, sahinggo mambuek Andy Bule agak saketek taheran-heran. “Baa amak indak kaberang dek waang, Ndy! Amak ko alah gaek. Wakatu amak lalu di Tugu Ayam Arosuka sabanta ko, amak calaik anak sakola sadang baciuman sarupo di film India. Awak ko tingga di bumi Minangkabau nan taat jo Agamo dan budayo Timur. Tapi kalau anak sakola lah mode tu, apo indak diajai dek mamak atau gurunyo di sakola. Kok kamanakan ambo tadi tu, alah amak lampang kapalonyo. Iyolah sabana samo jo nan bakaki ampek parangai anak sikola tu,” tarang Mak Malim Sampono, manarangkan apo nan baru sajo inyo caliak jo mato kapalonyo. “Ha, ha, ha, ha! Amak ko yo sabana urang lamo bana mah. Ma juo di zaman kini masih ado etika jo moral lai. Zaman kiniko alah zaman canggih. Apo nan tajadi di bumi Barat, alah bisa awak calaik langsunag di kamar awak melalui HP jo Lap Top. Kalau parangai anak sikola nan amak caritoan, itu kan lai indak sadonyo mode tu do. Masih banyak anak-anak jo ponakan awak nan lai sopan. Mungkin itu anak sikola dari lua daerah, nan urang tuonyo indak pernah mandangaan MTTS dari pemerintah awak,” jawek Andy Bule sambia galak gadang mandangaan carito Mak Malin Sampono.

“Tapi mungkin juo nan ang katoan tadi bana mah, Ndy! Kalau anak sikola dari Solok ko, inyo alah acok mandangaan ceramah masalah Musyawarah Tungku Tigo Sajarangan atau MTTS dari pemerintah daerah. Indak ka mungkin sakurang aja tadi. Masak di Taman Tugu Ayam nan barado di tapi jalan gadangnyo ka snai juo. Mungkin iyo anak sakola dari lua daerah mah!,” ujar Mak Malin Sampono, agak mulai tahibur hatinyo, mandanga anak sakola nna inyo caliak tadi indak pelajar dari Solok. “Tapi kalau itu bana anak sakola dari Solok, berarti pemerintah Kabupaten Solok nan lalu, alah gagal menerapkan MTTS di bumi bareh Solok ko mah. Kalau berhasil, tantu implementasi atau panerapan di masyarakat tamasuek jo anak sikola indak kamode nan amak caliak tadi,” tambah Andy Bule lagi. “Kalau amak caliak, di nagari awakko alah ampek lai diadoan MTTS. Tapi hasilnyo alun tampak lai. Kok pemerintah lai sukses menerapkan MTTS, di mano kaponakan menghormati mamak, nan gadang menghormati nan ketek, mako indak akan tajadi waktu pamilihan anggota dewan tahun kapatang dalam satu nagari, mamaknyo mancalon anggota dewan, kaponakannyo sato pulo menjadi caleg. Itu kan salah satu tando MTTS gagal mah!. Hanyo mahabiahan pitih APBD senyo,” terang Mak Malin Sampono lagi. “Apo nan Mak Malin sampaian tu bana mah, Ndy! Kalau awak calaiak, dari bara kali MTTS, parangai urang nagari mode tu juonyo. Alah samo se sawah jo pimatang. Punyo urang punyo awak juo. Indak ado raso jo pareso lai. Samntaro hakekt dari MTTS ko adolah jikok ado sebuah persoalan nan tajadi di dalam sabuah nagari, mako mamak jo kaponakan, pemerintah nagari akan duduak baropok untuak manyalasaiannyo. Nan kiniko awak caliak indak mode tu do. Ma nan banyak pitih, itu nan diharagoi. Bana nan dikecekan ka urang, kalau awak indak kayo dan bapangkek, jarang urang nan mau mandangaan ota awaknyo,” sela Da Indra, sipemilik lapau politik. “Kalau itu ambo sapakek jo Uda Indra mah! Zaman kini kok lai bapitih jo bapangkek, apo nan kadisampaian lai didanga urang. Tapi indak masuek ka hati do!,” jawek Andy Bule sambia menekan tanda like di fecebooknyo***