Pak Dewan Banyak Nan Ogah Dikritik

OLEH: WANDY

Pak Dewan Banyak Nan Ogah Dikritik

“Mak, awak baco di koran-koran, katonyo banyak dari pejabat dan pak dewan awak nan masih alergi dikritik dek media. Kalau mode itu sikap pejabat dan pak dewan awak, iyolah sabana picik bana pikirannyo mah. Bilo lo awak kamaju dikritik sajo masih ogah!,” tanyo Andy Bule ka Mak Malin Sampono, katiko mambuka ota di lapau politik milik Da Indra, Kawasan Kayu Aro, Rabu kapatang.

“Mungkin dek banyak dari pejabat jo pak dewan awak tu nan alah maraso hebat mah, Ndy! Kalau urang alah maraso hebat, tu samo jo sombong mah, alah maraso bana indak amuah mandanga nasehat urang lain lai,” jawek Mak Mlin Sampono, sambia maaduak kopi luwak nan baru dipasan ka Da Indra. “Kalau masih makan uang dari APBD atau uang rakyat, wajar sajo karajo awak dikritik dek media atau dek LSM bagai. Tapi guno media adolah untuak mengawasi karajo pemerintah jo pak dewan nakal,” jawek Andy Bule, nan sato pulo esmosi mambaco berita anggota dewan jo SKPD nan masih ogah dikritik. “Tapi sabanayo, tugas media jo pak dewan tu ado nan mirip yaitu maawasi karajo pemerintahan atau kecek urang kini sebagai lembaga kontroling. Harusnyo anggota dewan tu yo pandai bamitra jo media. Indak manjadian media sebagai musuah do,” sambunag Mak Malin Sampono, sambia maegang KORAN PADANG nan alah talatak di lapau politik milik Da Indra. “Tapi awak kan alah samo tau mah, nan manjadi anggota dewan tu latar belakangnyo babeda-beda. Tantu pengalaman dan pengetahun mereka babeda-beda pulo. Sabananyo meski dibekali SDM sabalum batugeh, tapi watak asli urang tu alah susah untuak dirubah,” jawek Andy Bule, sambia memberi ‘like’ di Facebooknyo.

“Sistim pamilihan anggota dewan awak nan alah salah kaprah, Ndy! Ancak juo zaman pak Harto, nan ado pengalaman bisa duduak di dewan. Tapi kini nan punyo pitih banyak nan dipiliah dek masyarakat. Jadi wajar sajo setelah tapiliah baa caro mandapekan pitih nan banyak. Salah satunyo dengan main proyek, tamasuak minta fee dari fokir,” jawek Mak Malin Sampono, sarupo bukak kulik tampak isi. “Kabanyo awak danga kini masyarakat banyak nan maupek ka pak dewan tu. Dulu waktu musim kampanye, tangah malam nyo gedor pintu rumah urang minta dukungan. Tapi kini jan kasingggah, malengah sajo karumah warga alah mulai ogah. Selain tu, pak dewan awak sibuk kalua kota. Kok dikritik apo hasil dari kunjungan tu dek media, wartawan lonyo musuhi,” tarang Andy Bule tabao emosi.

“Alah, biaselah pak dewan tu sasuko hatinyo. Manga pulokadiurus, inyo juo kabadosonyo. Karajo awak selah kadikakok. Tahun bisuakko jan dipiliah jo lai nan mode tu, bia nak nyo rasoan lo,” sela Astra, musuah babuyutan Andy Bule, nan dari tadi sibuk main catur bersama Da Indra sipemilik lapau politik***