Tagalak Surang Se

OLEH: WANDY 

Tagalak Surang Se

            “AWAK Caliak dari tadi, agak acok ang galak surang mah Ndy. Lai go aman-aman se?,” tanyo Mak Malin Sampono ka Andy Bule waktu duduak di lapau politik milik Da Indra, Rabu sore kapatang.

            “Baa pulo kok model tu pertanyaan amak ka awak ko. Amak kiro awak lah gilo yo? Awak galak tu bukan dek alah kanai, tapi wak takana dek waktu jalan tadi siang, dima kalau wak batanyo ka masiang-masiang pendukung calon, urang tu alah barani mangecekan raso calon nan inyo dukuang tu nan kamanang pado Pilkada bisuekko!. Ntu baa lo awak indak kagalak dek amak du. Nan awak tau, dari tigo pasang calon tu, nan kamanang pi hanyo ado sapasangnyo,” tarang Andy Bule, manjawek pertanyaan Mak Malin Sampono nan alah menjadi teman sekaligus lawan debat politiknyo sajak duo tahun terakhir. “Kalau itu alah biaso nah, Ndy! Sia lo nan ka amueh dikatoan jagoannyo akan kalah. Makonyo wak caliak se tanggal 9 tu. Pasti suaro tabanyak nan kajadi pamanangnyo mah! Jawek Mak Malin Sampono ka Andy Bule sangat diplomatis. “Kalau itu jaweknyo wak lai picayo nah mak! Sabek suaro tabanyak pasti nan kajadi Bupati, kalau nan duo pasang lai tantu akan baliak ka karajonyo masiang-masiang,” balas Andy Bule.

            “Waang lai kasato mamiliah tu, Ndy? Kalau indak sato mamiliah, itu namonyo Golput alias indak punyo pandirian tu. Gunokanlah hak suaro awak, sabek bak kecek pakar politik Kabupaten ko, ciek suaro sangat manantukan nasib Kabupaten Solok Limo tahun kamungko,” cetus Mak Malin Sampono. “Kalau awak dari dulu alun ado nan ndak sato mamiliah lai mak. Tamasuek mamiliah si Iyen ka manakan amak tu untuak dijadikan bini. Tapi dek amak indak buliah. Amak kecekan awak indak sanggup maagiah makan kaponakan amak tu, kini inyo alah balaki jo bandar BT. Alamat alah sasek panumpang dek supir mah. Baa jo kini kamambaliakan lai, nasi alah manjadi bubue,” sindia Andy Bule ka Mak Malin Sampono. “Baa pulo kok sampai ka carito Iyen ko. Tapi tema wak kiniko masalah Pilkada dan Golput,” tarang Mak Malin Sampono nan alah mambari judul debat sore tu. “Haa haha, amak kiro carito awakko seminar nan ado pulo judulnyo. Iko ko kalau di koran namonyo carito lapeh mah, Mak!,” ceplos Andy Bule agak tagalak gadang dek mandanga Mak Malin Sampono alah manyabuik judul debat politik sore tu.

            “Itulah, Ndy! Awak ko maota harus pakai judul agar carito indak kalua dari tema. Sadang calon Bupati jo Wakil Bupati se badebat ado temanyo dan mamakai dana nan indak saketek, apolai awak nan di mato urang sakitar lapau ko alah dibari gala pengamat politik pinggiran, namun buktinyo wak bisa tau tando-tando alam, seperti kalau galok dimudiak batando hari akan hujan mah,” kato Mak Malin Sampono sambia cimeeh. “Kalau itu bisa sajo urang sadonyo tu mak! Itu samo sen jo kalau awak lapa ubeknyo makan dan kalau aus ubeknyo minum dan kalau kanai wak bao ka Rumah Sakik Gaduik,” garah Andy Bule.

            “Tapi nan awak baharok agar di Kabupaten awakko yo lahia pamimpin nan pro ka rakyat, nan indak sakadar mancari proyek untuk tim sukses se do. Habis Pilkada, mari samo-samo wak dukuang Bupati dan Wakil Bupati tapiliah. Sabek tujuan demokrasi adalah mancari pamimpin pilihan rakyat, sudah tu walau inyo indak sato mamiliah Bupati nan manang, Bupati jan sampai ado pulo dandan ka daerah atau ka urang pribadi,” ceramah Mak Malin Sampono.

            “Tapi ambo indak yakin kalau sasudah Pilkada ko akan ado kotak-kotak, tamasuek untuak PNS. Nan indak pro ka Bupati tapiliah, pasti akan tacampak. Kontraktor kalau indak mandukuang, limo tahun indak dapek proyek, sarupo tahun lalu tu,” sela Astra, yang dari tadi asyik se mandanga carito Andy Bule jo Mak Malin Sampono. “Waang go tau apo tentang politik Astra. Nan lalu alah balalu, kecek amak tadi pamimpin nan kadipiliah bisuekko, jan sampai mode tu pulo,” potong Mak Malin Sampono, nan balawan bana jo Astra***