Pabanyak Se Basyukur

 Oleh :WANDY

Mari Pabanyak Basyukur       

            MAK, indak taraso sei, puaso kita hari kiniko alah masuak hari katigo. Yo taraso capek dunia ko baputa kini rasonyo mah Mak Malin,” ujar Andy Bule, katiko mambuka ota sambia manunggu babuko di lapau Da Indra, kawasan Kayu Aro Rabu kapatang.

            “Kalau awak baapuaso jo Iman dan panuah perhitungan, tantu puaso ko indak ka manjadi baban dek awak do. Nan jaleh bana, awak hanyo baganti waktu makan dan minum sajonyo. Kok bulan puaso siang kito makan, mako bulan puaso baganti jo malam. Sudah tu bulan puasoko yo bana-bana panuah berkah dan pengampunan. Sabek lalok urang puaso iyo diagiah pahalo oleh Allah,” jawek Mak Malin Sampono, sambia manyemba KORAN PADANG nan talatak di ataeh meja. “Iyo batua nah, Mak Malin. Tapi kok lalok nan diagiah pahalo tu tantu indak lalok dari pagi sampai manjalang waktu babuko do. Nan dimaksud diagiah pahalo tu adolah satelah urang tu beraktivitas sarupo biaso, sudah tunyo istirahat lalok, itu nan diberi pahalonyo. Kok dari pagi lalok sen, waktu babuko jago, itu samo sen jo indak puaso mah,” jawek Andy Bule panjang leba.

            “Tapi tahun kini awak patut basyukur, sabek dari partamo puaso hinggo patang, munsajik jo surau pado panuah. Amak sepatang dapek shaf nan paliang balakang. Sudah tu para ustad nan maagiah pangajian iyolah canggih-canggih dan terkenal. Bahkan ado nan alah masuak jadi penceramah di Surau Tivi bagai. Pokoknyo bulan puasoko wak tingkekan ibadah untuak manuju kampung halaman awak di akhirek,” cetus Mak Malin Sampono. “Satuju bana nah Mak Malin. Kok bisa dalam satiok pikirian awak ko, jadikanlah seolah-olah bulan puaso kiniko bulan puaso tarakhir dek awak, agar bisa memotivasi awak beribadah. Dan sia nan kamanjamin awak kabatamu jo bulan puaso tahun ciek lai,” cetus Andy Bule. “Makonyo, wak ajak anak kapoanakan awak sumbahyang di munsajik, bia indak bakaliarannyo hilia mudiak. Sudah tu kalau ndak awak para urang tuo jo mamak, sia nan kamanjago anak kaponakan awak. Kok guru sakola wakatunyo maaja tabateh. Anak labiah banyak jo orang gaek di rumah dari pado jo guru. Kok anak nakal, awak indak bisa manyalahan guru samato. Nan tau parangai anak awak, tantu jaleh urang tuonyo. Jadi mari salamatkan anak ponakan awak dari hal-hal indak baguno,” ajak Mak Malin Sampono. “Batua bana nah, Mak Malin!, nan jaleh bana pado bulan puasoko, mari makmurkan munsajik jo surau. Aratinyo, wak tingkekan ibadah dan bainfak pado bulan puaso, sabek pahalonyo dilipek gandakan dek Tuhan. Kok anak-anak, wak ambekan mambaka petasan dan main balap-balapan di malam hari di jalan raya,” sambuang Andy Bule.

            “Tumben Andy mangecek baco urang bana, Mak Malin. Biasonyo kamari mangalasau sen. Kini alah sarupo bana jo ustad Yusuf Mansyur nan acok di tivi tu,” sela Astra nan sadang main catua jo Da Indra, pemilik lapau politik. “Alah, kok urang hatinyo busuak, mandanga urang maota elok salah juo dek inyo. Rancak ang urus bini-bini ang nan banyak tu, sabalun inyo datang kamari mambao tangkai sapu,” jawek Andy Bule, nan disambut galak ketek dek urang saisi lapau***