Mangiro-Ngiro

WANDY

Mangiro Ngiro

            “SIA nan kamanang dalam Pemilihan Bupati awak tanggal 9 Desember bisuek ko kiro-kiro manuruik amak?,” tanyo Andy Bule, ka Mak Malin Sampono, katiko sadang duduek-duduek di lapau politik milik Da Indra sambia mambuka carito, di kawasan Kayu Aro, Rabu sore kapatang.

            “Kalau amak yakin nan kamanang tu pasti suaro nan tabanyak. Sabek dari pangalaman awak nan sudah-sudah, keputusan KPU yo mode tu kasado alahe,” jawek Mak Malin Sampono, sangat diplomatis, sambia menghisap rokok kretek kesukaannyo dalam-dalam. “Kalau itu tantu iyo mah, Mak! Anak ketek tau juo mah. Tapi kan amak ahli strategi dan punyo indra kaanam, biasonyo ramalan amak jarang nan malesetnyo. Kecuali untuak pasang angko BT, amak emang acok indak masuek,” jawek Andy Bule, juo sambia manyemba roti hijau kasukaannyo. “Baa kok indak mode tu amak manjawek, sabek awak manusia indak bisa mendahului nan diateh do. Salain tu, indak bisa awak mangiro-ngiro sia nan kamanang, sabek katigo pasang calon nan alah ditetapkan KPU, punyo paluang nan samo. Nan indak punyo paluang urang nan indak macalon,” jawek Mak Malin Sampono lagi. “Kalau itu iyo alah dewasa bana komen amak nah. Sabek kalau awak batanyo kapandukuang Calon Bupati, urang tu akan manjawek bahwa jagoannyolah nan akan manang. Tanyo kapasangan A, inyolo nan kamanang, tanyo kapandukuang B jo C, inyolo nan kamanang, meski awak kasadonyo tau baraso nan kamanang tu hanyo ado satu pasang calon,” terang Andy Bule lagi. “Koment baa kecek waang ko, Ndy. Ang kiro amak mangecek di Facebook. Amak hanyo mangatoan nan sabananyo, baraso maramal atau mangiro-ngiro indak bisa do, kok tau urang sia nan kamanang, mangan juo pemilihan  tu digelar lai, mahabiskan anggaran se ndak ado tu. Emangnyo anggota dewan awak nan karajonyo kunker tiok sabanta se,” kecek Mak Malin kamari malambai sen. “Lho, kama lo painyo tu. Kok anggota dewan lo nan disabuik, karajo anggota dewan tu dari dulu emang untuak jalan-jalan, manga lo amak ka iri. Amak disuruah mancalon dulu indak amuah. Kini manga lo urang-urang tu dipagunjingan,” sambut Andy Bule, manjawek kecek Mak Malin Sampono nan alah seperti bola pimpong, kamari mangaranjai sen.

            “Kalau masalah Pilkada Bupati awak, nan kamanang alah jaleh nah yang unggul jumlah suaro. Tapi masalah kunker nan kecek Mak Malin tadi, iko nan angek diotaan urang kini mah, Mak!. Dalam sabulan ko, alah ampek kali anggota dewan tu kalua daerah. Yo sabana hebat. Samantaro masyarakat awak ditinggaan dalam sadang kasusahan, karano padi dek mancik dan bawang dek kabuik. Iyo sabana ‘Terlalu’ kecek Bang Haji Rhoma Irama,” sela Astra, yang dari tadi serius  manyimak ota Mak Malin Sampono jo Andy Bule. “Kalau ang apo pulo nan katau tentang anggota dewan tu, Astra. Ang urus selah bini-bini waang tu, kalau masalah dewan kunker jo Calon Bupati biaselah kami nan maurus,” jawek Mak Malin Sampono, nan satiok hari selalu berlawanan dengan Astra, kebetulan memang dikenal tukang banyak bini di kampuang tu. “Ndeh, kalau bacakak mode ko, labiah baiak ambo salat Ashar dulu, indak ado guno manggunjiangan anggota dewan tu do. Kan mereka pergi kelaur daerah untuk kepentingan rakyat juga, meski awak ndak tau rakyat yang mana,” kecek Andy Bule sambia pamit untuak salat Ashar di masjid sabalah***