KPK Tankok Tangan IG

Gulo Memang Manih

            “Mak, kabanyo ketua DPD RI Pak Irman Gusman nyo tangkok dek apak-apak dari KPK dalam Opreasi Tangkok Tangan di rumah dinas katua DPD di Jakarta, takaik kasus pangurusan distribusi kuota gulo inpor  langkok jo BB pitih saratuh juta. Iyo batua tu, Mak?! Bak disemba patuih di siang bolong, indak hujan indak paneh, tibo-tibo awak dikajukkan dek berita Ketua DPD RI apak Irman Gusman tatangkok tangan. Baliau tu kan urang kabanggan urang Minang nan manajdi katua DPD duo kali. Tapi kini dek ulah kasusko, urang Minang alah sato lo manangguang malu. Sia nan batua, KPK atau pak Irman nan kanai jebak, awak iyo indak tau bana do, Mak Malin,” tarang Andy Bule panjang leba, mangisahkan kasus nan manimpo pak Irman Gusman nan kini alah ditatekan dek KPK sabagai tasangko.

            “Kok sia nan salah sia nan batua nan Andy tanyo, amak iyo kurang paham lo nyo! Sabek kok menjadi pajabat tu,  memang iyo banyak godaan dan saingan. Sudah tu, kadang kasus baru dimunculkan ka publik ko, hanyo sakadar untuak mangalihkan paratian atau untuak mahilangkan kasus nan sadang angek. Alun tuntas kasus dugaan korupsi reklamasi Taluak Jakarta, kasus pengelembungan dana ganti rugi Rumah Sakik Sumber Waras, kasus Jesika bunuh Mirna dan kasus lainnyo, mako kini sangajo diapuangkan kasus lain untuk maalihkan paratian publik,” jawek Mak Malin Sampono, sambia matonyo taruih tatuju ka Metro TV nan sadang manyiarkan secara langsung apak-apak dari penyidik KPK, manggaledah gudang gulo di Padang milik salah satu tasangko dugaan palaku penyuapan ka pak Irman Gusman. “Tapi kalau wak carito tantang gulo ko, yo sabana manih mah, Mak! Sia se pasti akan tagoda mancaliaknyo mah, apo lai dicampua jo aia angek dan kopi agak satangah galeh, mako akan bakaluntun puntun rasonyo mah! Sampai indak katampak gai mintuo lalu di Alahan Panjang dari Arosuko go doh,” jawek Andy Bule sambia mamencet tuts HP nan di ma Andy sadang mambaleh BBM dari kawannyo nan sadang sakola di Banduang.

            “Tapi kok baliak awak kacarito pak Irman nyo tangkok dek apak KPK tadi. mako banyak nan mambuaek kapolo wak paniang manakok sia nan bana atau nan salah, mah. Kecek pangamat hukum nan wak tonton di tivi, pak Irman indak basalah dan surang lai mangecekan alah lamo pak IG  tu nyo intai dek KPK. Tapi nan intinyo bana, gulo ko yo manis dan banyak nan suko maminumnyo indak jaleh halal jo haram tu,” jawek Mak Malin Sampono sambia mambaka rokok kretenyo nan dari tadi siang antah alah bara batangnyo rokok nan baliau isok, meski rokok katonyo marusak kanker, menyebabkan inpotensi dan lain sabagainyo.

            “Kini ko, apo selah hasil pemeriksaan nan nyo umumkan nanti dek KPK,  nan jaleh namo urang Minang alah kanai buruak dan tabao rendong sen. Namun kalau sia nan batua dan sia nan salah sabanyo, di akherat juo akan tarungkap,” sela Astra nan sibuk lo manonton Televisi kasus Sidang Jesika Bunuh Mirna nan juo sadang siaran langsuang alah bara hariko di TV One, sabek lawan main catuanyo Da Indra ado paralu ka Padang manjapuik dunsanaknyo nan baru pulang dari manunaikan ibadah haji.

            “Tumben kok bana ang sakali ko?,” tanyo Andy Bule ka Astra, nan biasonyo salalu balawan jo Andy Bule. Mungkin dekumua alah batambah juo, Astra mulai manjago kato-kato, alah malu dek anak ponakan***