Korban Parasaan

WANDY

Korban Parasaan

            “Lai banyak urang ba kurban di surau dakek rumah Andy hari rayo haji patangko,” tanyo Mak Malin Sampono, ka Andy Bule, katiko maota-ota di lapau politik milik Da Indra, Kawasan Kayu Aro, Rabu kapatang.

            “Alhamdulillah lai ado salapan ikua, Mak Malin! Jawi Ampek ikua, kambiang tigo ikua dan kabau saikua. Kok dibandiang rayo haji tahun lalu, lai batambah duo ikua, Mak!,” jawek Andy Bule, sambia maelo Koran Padang nan alah manjadi bacaan nomor wahid di lapau tu sajak ampek tahun balakangan. “Tu lai marato urang kampuang mandapek kasadonyo. Lai ndak urang tukang bantai jo tukang bagi se nan banyak dapek, Ndy? Kok dakek rumah amak, yo agak ado nan aneh stek. Amak caliak masih ado nan main curang. Kok dagiang paho jo kaki ado nan duo surang mahelo. Yo bana-bana nyo manfaatkan momen kurban nan datang sakali satahunko! Mantang-mantang tukang mambantai, nyo bagi se dagiang tu untuak kaluarganyo surang. Ndak nyo pikian ka mancret bagai paruknyo beko, Padohal masih banyak nan masih alun mandapek lai,” tarang Mak Malin Sampono, sambia manyambuang rokok kreteknyo nan alah tapuntung. “Masok iyo ado nan mahelo duo karek, Mak. Samo sajo jo indak bataratik namonyo tu! Kan dagiang kurban tu harus dibagi rato, tarautamo sakali untuak dunsanak awak nan agak kurang mampu atau nan berhak manarimo. Bianyo marasoan pulo lamanknyo dagiang pakah lamaknyo kalau dirandang atau disate sarupo nan ado di pajang pado Facebook kawan-kawan awak dari seluruh nusantara tu,” tarang Andy Bule, anak muda nan mampunai raso paduli nan tinggi antar sasamo.

            “Tu baa jouo lai, Ndy! Kok kaditegur, beko berang lo nyo kaawak. Indak diingekan awak lo nan kanai. Kasinan rumik kasiko bedo deknyo. Kok bisa, awak urang Minang ko yo tau dek agak andaknyo. Aratinyo managarati ereng jo gendeng. Jan samoan se sawah jo pamatang. Buliah jatah awak diambiak, jatah urangjan dihelo pulo. Jan iduik sakandak hati wak surang se. Alah dapek kaki jo paho, mintak ati lo lai,” tarang Mak Malim Sampono jo nada agak maninggi. “Itulah paralunyo agamo , Mak! Dalam ibadah kurban yang dimulai dari Nabi Allah Ibrahim nan rela akan mamotong anaknyo Nabi Ismail, ko ndak salah tasimpan palajaran nan banyak. Saidak-idaknyo awak harus baraja ikhlas, baraja saba, suko babagi jo sasamo dan juo mau manolong sasamo awak. Bukan bakkato awak sen,” cocor Andy Bule, nan sato lo tabao rendong emosi dek mandanga ado urang mambagi dagiang kurban sasuko hatinyo sen.

            “Kok urang bakurban lo nan dibahas, kok iyo curang, inyo juo kabadosonyo. Apo awak lai sato lo bakurban tu?,” tanyo Astra nan sarupo biaso sibuk main catua basamo Da Indra, calon Atlet Porprov asa Kabupaten Solok nan alun tantu kadikirim dek KONI lai, sabek dana hibah KONI yang Rp 4,2 Milyar alun bisa dicairkan dek ado rong-rong kepengurusan dan DPRD lai. “Ambo tiok tahun sato bakorban mah. Tapi yo samantaro baru mampu bakorban parasaan se baru. Aang indak mangarati carito kami do, pion ang selah nan kadiurus,” jawek Andy Bule sapontan, manyarang Astra. Mak lum urang baduo tu musuh babuyutan, meski kalau sahari indak basuo saliang mananyoan***