Bupati Sidak Kakadai

WANDY

Bupati Sidak Kakadai

            “Ndy! Amak baco di KORAN Padang, katonyo apak Bupati awak manangkok basah pagawai nan sadang basantai di kantin disaat jam karajo. Kabanyo banyak pagawai nan lari tunggang langgang karano takajuik mancaliak apak Bupati datang. Apo berita tu batua, nakan?,” tanyo Mak Malin Sampono, sarupo biaso katiko duduk di lapau politik milik Da Indra nan indak jauah dari Tugu Ayam.

            “Kalau itu batua mah, Mak Malin! Bupati malakukan sidak ka kadai-kadai, dek acok mandapek laporan baraso ruang karajo acok kosong. Jadi baliau langsuang mancek ka lapangan, tanyato memang banyak pagawai jam karajo nan basantai di lapau atau kaluyuran wakatu jam karajo. Kalaupun ado nan tingga di ruang karajo, paliang-paliang inyo main gim mah, Mak!,” jawek Andy Bule, nan jari tangannyo sarupo biso indak lapeh dari mamencet WA nan alah dianggapnyo bini kaduo. “Tu apo sanksi yang diagiahkan kapagawai nan tatangkok tangan tu, Ndy. Kabanyo kabapindahan lo ka Tigo Lurah?,” kecek Mak Malin Sampono, yang nampaknyo masih panasaran mandanga carito Bupati sidak kalapangan tu. “Kok sangsinyo mungkin alun ado lai, Mak! Tapi saidak-idaknyo, Bupati alah maagiah sok tarapi ka pagawai nan alah biaso indak disiplin tu. Bahkan kabanyo ado juo pagawai nan pai kapasa babalanjo wakatu jam karajo. Pokoknyo mode itulah carito pagawai awak kini, Mak!,” jaleh Andy Bule. “Tapi alah acok amak baco sindiran di koran-koran, baraso pagawai awak, tamasuak anggota dewan yang terhormat tu banyak nan indak disiplin. Apo urang tu lai baco koran atau memang alah mada. Atau pak Satpol Pepe awak indak bakarajo?,” tanyo Mak Malin Sampono, nan juo sambia manyambuang rokok kaaretek kasukaannyo nan alah tampak tapuntuang.

            “Antahlah, Mak! Nampaknyo indak talok dek Satpol Pepe tu lai, alah tradisi dari dulunyo mode itu. Nan jaleh, kalau kasadaran alun lahia dari dalam ati awak, mungkin yang namonyo disiplin ko susah untuak ditagakan,” jaleh Andy Bule, nan sabanyo alah maleh mambahas masalah pagawai jo anggota dewan nan indak disiplin ko. Sabek manurut Andy Bule, pacuma sajo bakoar-koar, samantaro urang-urang tu alah basipakak basibanak sen. “Apo paralu pulo apak-apak nan dari KPK tu turun tangan malakukan OTT lai, Ndy?,” kecek Mak Malin, sambia tagalak gadang. “Kama lo painyo tu, Mak! Pagawai yang indak disiplin, kok apak-apak dari KPK lo nan turun. Itu kan lah lain biliek mah, Mak! Sela Astra nan sarupo biaso sibuk main catue jo pemilik lapau politik, Da Indra. “Baa pulo kecek ang ndak ado hubungannyo jo KPK, Astra. Pagawai kaluyuran jam karajo tu, kan alah tamasuak korupsi wakatu du. Alah wajar KPK turun malakukan Oprasi Tangkok Tangan atau OTT sarupo nan dilakukan ka apak Ketua DPD RI, pak Irman Gusman tu,” jawek Mak Malin sacapek kilek.

             “Ondeh, iyo pulo yo mah Mak Malin. Kaluyuaran jam karajo batua alah tamasuak korupsi mah. Astra tu alun sampai utaknyo kasinan lai tu, Mak!.” Baleh Andy Bule, nan alah manjadi musuah babyutan dek Astra, sambia di baleh jo galak gadang dek saisi lapau nan hadir***