Cuaca Buruak, Indak Bisa Manongkang

Oleh : WANDY

Cuaca Buruak, Indak Bisa Manongkang

            “Mak, dalam duo pakanko, iyo sabana indak bisa awak mancaliak matohari. Hujan turun dari sanjo sampai sanjo lo baliak. Cuaca tu bana-bana nan indak basahabat, sampai karajo awak banyak nan tatunda,” kecek Andy Bule ka Mak Malin Sampono, mambukak ota di lapau politik milik Da Indra, kawasan Kayu Aro, persis di muko kantua Bupati Solok, Rabu kapatang.

            “Batu mah nakan, amak se ka pai baralek ka rumah sumandan Sabtu kapatang, indak jadi pai. Sabek hujan ndak baranti dari pagi sampai sanjo ditambah lo jo angin kancang. Iyo sabana tahambek langkah awak dek hujan ko,” jawek Mak Malim Sampono, sambia maaduak teh sarok nan alah baliau pasan dari tadi. “Nan labiah parahnyo, padi si Amir nan alah masak dan siap batongkang, kini alah maraok se ka sawah. Baa lo kamanongkangnyo, hari tu bana nan indak basahabat, hujan se siang malam. Sudah tu, angin kancang alah mambuek ekonomi awak jadi lumpuah,” tarang Andy Bule, nan tangannyo indak lapeh dari HP sambia mangetik balasan WA dari kawannyo di Padang nan mananyoan harago bareh sokan di Solok salamo musim hujan ko. “Itulah nakan, indak padi si Amir se nan alah ranum di sawah do, padi mintuo nakan yolah rabah se kini mah. Baa lo kamanongkangnyo, hujan tu bana nan indak baranti. Sudah tu, yo ibolo awak dek dunsanak awak nan punyo taranak, hujan-hujan harus manyabik rumpuik. Jawi jo kabau tu indak mau peduli, mau hujan atau paneh, nan inyo tetap minta makan. Inyo indak mau tau, apokoh majikannyo sadang bacakak jo bininyo atau sadang mamikian biaya anak sakola,” jawek Mak Malin Sampono satangah bagarah. “Itulah, Mak Malin, nan bedo bana kalau taranak  alah gadang, beko ado nan mancilok. Indak paduli urang basusah payah manyambik bahari-hari. Maliang tu tetap se tutup mato, nan pentiang inyo bisa mancilok. Mau jawi urang susah atau urang kayo,” carito Andy Bule, kasinan kamari. “Itulah, Ndy! Kok bisa aman sarankan kamaliang tu, jan lah mampasusah urang nan susah. Ibo awak dek dunasanak awak nan mahabehan taranak urang, mereka hanyo sakadar maharoakan komisi untuak sakadar tambah-tambah pitih balanjo untuak anak bini, tapi malah malapeh hao dek ulah urang maliang taranak nan pancilok tu,” jaleh Mak Malin Sampono sambia mahiruk rokonyo dalam-dalam.

            “Kok bisa amak manyarankan ka maliang tu, bararti amak tau sia nan maliang Jawi salamo ko. Tamasuak jawi jo kabau Tek Iyar nan ilang wakatu hujan kapatangko.  Kalau ndak, baa lo amak ka maagiah saran ka maliang tu,” sela Astra nan dirinyo sibuk menyaksikan ramainyo masyarakat Indonesia yang mendatangi Stadion Pakansari Bogor menyaksikan final Pila AFF antaro Indonesia jo negara gajah putiah Thailand. “Muncuang ang tu sakadar malambai se mah Astra. Kok urang Minang ang tu mangarati jo ereng dan jo gendeng, tau jo kato mandaki jo manurun. Maksud Mak Malin tu, baliau kan ikut prihatin, kok ado jo niek urang maliang kamancilok, jan lah harato urang susah juo nan diintai. Ibo awak dek inyo. Alah susah kanai maliang lo lai,” jaleh Andy Bule, masuah babuyutan Astra. “Bia selah, Ndy! Amak tau, caro manarimo nasehat dari masiang-masiang awak babeda. Mungkin Astra laun faham kecek amak tadi lai,” tarang Mak Malin Sampono, urang gaek nan bahati mulia, sambia manyambuang rokok kretek nan alah manajdi kawan setia Mak Malin Sampono ***