Halaman Riak Danau: Wakatu Baputa Taraso Capek

OLEH: WANDY

Wakatu Baputa Taraso Capek

            “Iyo taraso capek bana wakatu baputa kini yo, Ndy! Rasonyo kapatangko awak mamiliah Bupati jo Wakia Bupati baru, tau-tau kini alah nak satahun se lai,” kecek Mak Malin Sampono, mambuka ota di lapau Da Indra, nan indak jauah dari Tugu Ayam, Arosuka, Rabu sore kapatang.

            “Itulah, Mak Malin! Kapatangko awak masih sibuk kampanye, tapi kini alah satahun se Bupati manjabat. Apoko lah batando dunia samakin tuo, Mak?,” jawek Andy Bule, nan baliak batanyo ka Mak Malin. “Iyo juo mah nakan, namun aratinyo awak dituntuk untuak labiah banyak maranuang. Kapatangko abuek amak masih itam kasadonyo. Kini malah banyak nan putiahnyo nan mancogok. Bararti ko alah kode alam mah, Ndy untuak urang nan bapikia!,” jawek Mak Malin Sampono, sambia mambaka rokok kretek nan alah manjadi kawan setianyo. “Itulah Mak, Tuhan juo alah manyabukan, baraso pagantian siang jo malam atau tahun ka tahun, iyo tadapek tando-tando kekuasaan Allah di dalamnyo. Tapi yo masih banyak diantaro awak nan kurang menyadarinyo. Zaman kiniko, banyak diantaro awak nan alah sibuk maurus dunia se, samantaro kapentingan akirek bakasampingkan. Padohal awak tau, dunia ko hanyo pasinggahan. Jabatan jo pitih banyak, tamasuak bini rancak, sifatnyo pimjaman dan hanyo samantaro. Alah tibo wakatunyo, yang punyo pasti manjapuik,” tarang Andy Bule, anak muda nan faham banyak saketek faham bana jo agamo.

            “Amak yo bangga punyo nakan sbagai anak mudo nan punyo wawasan tinggi, baik ilmu pengetahuan mapun tantang agamo. Kok bisa awak iduik ko iyo baraka, kok mati yo bariman. Tantang Tuhan babuek sakandak ati, alah tampak bana contoh dek awak, kapatangko rasonyo baru tajadi longsor di kampuang awak Lubuak Salasih, samalam alah tajadi lo baliak longsor di Aia Batumbuak. Kok dipikia-pikia, kahandak Tuhan indak ado awak nan tau surang juo do,” jaleh Mak Malin panjang leba.

            “Itulah Mak, awak ko hanyo manusia biaso nan diciptkan untuk manyambah kapado Tuhan. Tapi kini banyak urang nan manyambah kapajabek, hanyo untuak mandapekan pangkek jo kadudukan. Dan itu sangek banyak tajadi kini, Mak!,” carito Andy Bule, sambia mambaleh WA kawannyo di Jakarta nan mananyoan pakambangan pancarian musibah longsor  di Aia Batumbuak.  “Sadang lai acok amnyamabah kaatasan, indak juo naiak pangkek do, apolai kok indak manyambah, tantu kamode tu se nasib urang tu,” sela Astra nan dari tadi sibuk main catua jo Uda Indra pamilik lapau politik. “Samolo jo angkunyo, kodak manyambah kabini indak bisa kalua rumah do,” sela Andi Bule, nan diikuti galak gadang dek sesisi lapau***