PNS Nakal

“Mak iyo gadang pangaruih Pilkada patang ko ka roda pemerintahan. Bagi nan manang, yolai gadang galak. Tapi bagi nan kalah, terutama pejabat eselon, tampak bana gairah karajonyo bakurang,” ciloteh Andy Bule, mambuka ota di lapau politik milik Da Indra, Kawasan Kayu Aro, Rabu sore kapatang karano tafik nan hangat terkini di Arosuka hanyo masalah kantua bupati langang dek ulah PNS banyak nan sato tajun kapolitik praktis.

            “Itu batua mah, Ndy! Sabananya ikolah konsekwensi para ASN nan tangka. Lah jaleh PNS dilarang terjun kapolitik praktis, tapi wak bi mada juo. Akianyo nan rugi indak dirinyo surang do. Masyarakat alah sato pulo dirugikannyo, sabek gara-gara pejabat tu tidak punyo gairah karajo, pelayanan ka masyarakat jaleh taganggu,” jawek Mak Malin Sampono, sambia maaduak kopi nan baru dipasannyo. “Kabanyo alah banyak pejabat eselon nan indak mandukuang patangko nan mintak pindah ka Provinsi atau ka kota lain. Tapi kabanyo alun diagiah lampu hijau dek apak Gubernur lai,” jawek Andy Bule ka Mak Malin Sampono nan tangannyo manyemba KORAN PADANG nan talatak di ateh meja. “Amak yolai mandanga lo, mungkin pejabat tu malu kalau beko di non jobkan dek apak Bupati. Biasonyo dapek oto rancak jo sopirlo pai karajo. Sudah tu ditambah bon minyak dan tunjangan lainnyo karano acok kalua daerah. Kini tantu kapakai oto surang lai. Selain malu dek tetangga sabalah rumah juo akan malu dek pejabat nan akan manggantian posisinyo,” terang Mak Malin Sampono sambia mairuk rokoknyo kretek kesukannyo dalam-dalam.

            “Tapi kecek urang tuo dulu, kalau barani main apai, berarti indak takuik tabaka. Kalau barumah di tapi pantai, indak takkuik dek ombak do. Kalaulah PNS tu barani sato bapolitik, tantu sagalo konsekwensinyo alah dipatimbangkannyo sadonyo. Aratinyo, apo nan wak tanam itulah nan kadi tuai,” sambuang Andy Bule sambia matonyo mambaco berita Walikota Jakarta Utara mundur sportif karano dianggap dek apak Ahok indak sukses. “Kalau itu iyo awak protes mah, Ndy! Kalau barani mambuaek rumah di tapi pantai, bukan indak takuik dek ombak, tapi indak takuik dek sunami do,” ciloteh Astra, musuah babuyutan Andy Bule, nan sarupo biaso kalau hari manjalang asa, nyo sibuk main catur jo pemilik kadai politik, Da Indra, sarupo urang ka masuak TC penuh atlit Percasi. “Kalau dek ang alun tamakan pulo carito politik ko lai do Astra. Pi karajoan gilo kababini sen. Rancak bini ang tu ang urus lai,” jawek Andy Bule ka Astra.

            “Tapi sagalo sesuatu pasti ado hikmahnyo Ndy! Nan jaleh manuruik Peraturan Pemerintah, nan namonyo PNS baik pandukuang nan kalah atau nan manang, itu lah malangga aturan mah. Tingga keseriusan para pejabat daerah se manyikapi lai. Tapi zaman kini indak di Kabupaten atau Provinsi, para PNS ko lah sato lo bapolitik. Disuruah bana masuak partai, inyo indak lo do. Negara awak ko kini sadang kacau,” jawek Mak Malin Sampono, sambia maangkek telepon genggannyo, nan bininyo minta dijapuik dari pulang maaja anak-anak mangaji di surau sabalah***