OLEH: WANDY
Manunggu Mutasi
“Andy,
awak danga dalam wakatu dakek ko akan ado mutasi gadang-gadangan bagi PNS di
kantua Bupati awakko. Apo itu batua beritanyo?,” tanyo Mak Malin Sampono ka
Andy Bule, katiko duduak-duduak di lapau politik punyo Da Indra, Kawasan Kayu
Aro, Rabu kapatang.
“Kok
dibaco di koran, kabanyo alah sajak bulan Agustus patang ko akan ado mutasi
lai, Mak Malin. Tapi sampai kini alun juo baputa mutasi tu lai. Kok bisa,
Bupati jo wakil Bupati sacapeknyo maambiak sikap untuak malakukan mutasi tu.
Bia urang nan karajo indak maleh-maleh dan loyo. Sabek pejabat tu mungkin
bapikia, untuak apo karajo rajin-rajin, alun tantu juo nyo kadipakai dek Bupati
lai,” jawek Andy Bule panjang leba ka Mak Malin Sampono. “Batua bana itu mah,
Ndy! Amak satuju kalau Kapalo Daerah sacapeknyo manggulirkan mutasi tu. Sabek
itu kan alah hak kapalo daerah untuak manantukan sia urang nan kadipakai dalam
kabinet pemerintahan nan bisa mambantu tugeh baliau. Nan jaleh bana kalau
bagian teknis tantu urang nan mangarati teknis. Kalau untuak kapalo Dinas
Pendidikan, tantu iyo jaleh urang nan faham bana jo pendidikan dan memiliki
ilmu kepemimpinan, baitu juo untuak bagian nan lain. Urang indak bisa
mainterpensi atau ikut campua masalah mutasi go do. Nan bisa hanyo maagiah
saran, tapi kaputusan akhir tetap samo baliau tu!,” jawek Mak Malin Sampono,
sambia maelo Koran Padang nan ado di meja nan alun sempat beliau baco.
“Iyo
nah Mak Malin! Alah hampia lapan bulan Bupati jo Wakia Bupati dilantik dan alah
sawajarnyo pulo baliau manunjuak urang kepercayaan untuak diagiah mandat nan
sajalan jo baliau. Tapi sampai kini alun juo mutasi tu bajalan lai,” tarang
Andy Bule ka Mak Malin Sampono. “Apo mungkin dek masih manunggu SOTK atau kecek
urang kini Satuan Organisasi Tata Kelola, sarupo SKPD nan kabagabuang atau nan
kadipaketek alias dirampingkan?,” ujar Mak Malin sambia baliak batanyo ka Andy
Bule. “Mungkin juo kali mah, Mak! Kabanyo ado babarapo SKPD nan akan diilangkan
dan ado juo nan indak barubah. Tapi kalau pemerintahan indak jalan, nan jaleh
akan tajadi defisit anggaran karano proyek banyak nan indak jalan,” kecek Andy
Bule, nan tangannyo subuk mamencet tuts HP mambaleh WA kawannyo nan mananyoan
baa kok Semen Padang FC jarang manang di lua kandang di Liga Kopi Torabika.
“Masalah
mutasi, rotasi atau promosi kecek rang kini, itu alah karajo Bupati jo Wakie
Bupati mah, Mak Malin. Jadi manga lo awak nan kasibuk mamikian. Rancak main
catua wak, mano tau bulan November bisuakko takirim manjadi atlet ka Porprov di
kota Padang,” sela Astra, yang dari tadi sibuk se manonton TV masalah dugaan
adonyo katalibatan perlindungan aparat hukum masalah pambakaran rimbo dek
pengusaha di Provinsi Riau. Astra tapaso manonton Tivi, sanek lawan tandiangnyo
indak Da Indra sadang sibuk malayani pambali. “Itu batua juo mah Astra. Tapi
kalau awak indak paduli jo roda pemerintahan ko, sia nan kadipicayo lai. Kok
anggota dewan awak karajonyo pi sibuk kalua daerah sen. Padohal rakyat alah
mamiliah dewan untuak maawasi karajo pemerintah bukan bamitra jo pamerintah,”
jawek Mak Malin Sampono ka Astra. “alah, Astra indak paralu bana diladani tu
Mak Malin. Inyo indak faham jo carito awakko do. Rancak pulang awak lai, sabek
hari alah manjalang waktu Ashar,” tarang Andy Bule, sambia mengucapkan salam ka
urang di lapau dan di kawek sarentak ‘Wa’alaikum salam dek pengunjuang lapau
politik Da Indra***
No comments:
Write komentar